Guwahati, Iaiong 23: U Professor Debashish Bhattacharya jong ka Assam University, Silchar, bad ki bahaiing hasem jong u, ki la lait salit na ka jingiap ha ka jinghiar thma jong ki kynhun lehnoh kaba la jia ha Pahalgam, Jammu and Kashmir ha ka 21 tarik Iaiong.
U Bhattacharya, uba dei u Professor jong ka subject Bengali language, u dang don hapdeng ka shuti bad la kiba ha iing ha katei ka them kaba itynnad ha Jammu and Kashmir haka por shah hiar thma haki kynhun lehnoh.
“Ha kaba sdang, ngim shym la sngewthuh ia kaei kaba la jia. Ngi la iohsngew ia ki jingsawa ki ktang suloi bad mar kumta hi ngi la riehbha ha lyndet jong ki dieng ha khlaw. Ngi la thiah lyngkrang ha madan katba ki kuli ki dang her nalor. Uwei u briew u la shah siat iap beit ha khmat jong ngi, ki don ki dak snam ha ka jain jong nga” ong u Bhattacharya.
Katkum ka jingong u Bhattacharya, ki lehnnoh ki la bat ia katei ka longiing da kaba pynap suloi bad ki la dawa ba kin pule ia ka Kalima, kaba dei ka jingpynbna ia ka jingngeit jong ka niam Islam.
Kaba phylla ka long ba kane ka longiing kala lait im namar ka jing jingtip jong ki ia ka Kalima bad ban pule ia ka.
Uwei u dkhot jong katei ka kynhun u la iathuh ruh ba la kylli ia u hato ki dwai ne em ia ka kyrteng jong u Ram.
La iathuh ba uwei pat u nongjngohkai pyrthei, uba khlem lah ban pule ia ka Kalima u la shah pyniap ha katei ka jaka ha khmat jong ki.
Kane ka longïing ka la bat ia ïa kane ka jingjia kum ka jingjia kaba “shyrkhei bad kaba pynsngewsih tam ia ki.”
“Ngi la sdang ban pule ‘la ilaha ilallah’ haba utei u briew uba phong mask u la wan sha ngi. Nga la don ha ka jingshah pynap suloi, hynrei hadien kata, u la iehnoh ia ngi,” la ong u Bhattacharya.
“Nangta ngi la iaid kjat ar kynta lyngba ki lum. Shisien ba ngi la lap ia ka network mobile, ngi la phone ia u nongniah kali jong ngi, uba la ialam ia ngi sha Srinagar. Ngi la thmu ban sah ha Pahalgam hynrei ngi la mih noh mar mar namar katei ka jingjia.” u la ong.
Katei ka jingshah thombor kaba shyrkhei ha Pahalgam, ka la shim ia ka jingim jong ki 28 ngut ki nongjngohkai pyrthei, ba kynthup ia arngut ki briew na bar India.
Ka kynhun lehnnoh ka ka ‘Kashmir Resistance’ ka la kam ba ka la donkti ia katei ka jingthombor, wat la ki bor Sorkar kim pat lah ban pynshisha ia ka jingshisha jong katei ka jingkam.
