Guwahati, Jymmang 12 : Arngut ki Nongpyniap briew kila lait phet hynnin ka sngi Palei na ka phatok ka Silchar Central Jail, Silchar, kaba dei ka phatok bala shna naduh ka por jong ka Sorkar Bilat.
Kine ki nongpyniap briew kila ioh phet na kane ka phatok da kaba tih ia ka thliew lyngba ka jaka leit painkhana.
Kine ki arngut ki kyrteng u Hifzur Rahman bad u Deep Nunia kiba dei ki nongshongshnong ka Karimganj bad Cachar.
U Hifzur Rahman u dei uwei na ki san ngut kiba donkti ha kaba pyniap ia u samla pule Ahrar Ahmed ba na Karimganj ha u snem 2011.
Baroh kine ki san ngut kynthup kawei ka kynthei, kila shah pynngat shong phatok shirta jingim ha u snem 2013.
Ha kaba nyngkong, u Hifzur bad ki paralok jong u, kila ngat ha ka hukum rai pyniap da ka Karimganj District Court hynrei kila leit ban kyrpad sha ka Guwahati High Court kaba la rai ban pynjynsurnoh da ka hukum set phatok shirta jingim.
U Superintendent of Police ka Cachar District Numan Mahatta lem bad ka kynhun ki Heh Pulit kila hiar wut wut sha ka phatok ban tohkit ia kane ka jingjia. Ki Pulit kila register case pyrshah ia kitei ki arngut bad ka jingthwet mynta kala iaid shakhmat.
