Guwahati, Risaw 11: Haduh san ngut ki koidi kiba dang don hapdeng ka jingshah bishar hapoh ka kyndon POCSO, ki la phet tuh na phatok Morigaon District Assam hapdeng ka por 1 haduh 2 baje mynstep.
Halor kane ka jingjia, ka Sorkar Assam kala thung daka jingtohkit Magistrate.
Hadien kane ka jingjia, ka Sorkar kala wengkam shipor ia u nongap phatok u Prashanta Saikia bad la thung 2 ngut ki nongap phatok na Guwahati ban khmih iaka Morigaon District Jail.
U Inspector General (Prisons) u Pubali Gohain un pynlong ruh ïa ka jingtohkit ba kyrpang jong ka tnad halor kane ka jingjia.
Ki koidi kiba la lait phet, ki dei kiba la tip kyrteng kum u Saifuddin, u Ziarul Islam, u Nur Islam, u Mafidul, bad u Abdul Rashid bad ki la phet daka ba pynpait ia ki nar grill jong ka Jail bad kila phet daka ba pyndonkam da ki jain thiah ban kiew ia ka kynroh kaba 20 phut.
Katkum ka jingiathuh jong u Morigaon District Commissioner u Devashis Sarma, kitei ki koidi ki ba wanrah na ki thanat pulit ha Tezpur ha Sonitpur district, Lahorighat, bad na Moirabari ha Morigaon district.
U Superintendent of Police ka Morigaon u Hemanta Kumar Das u la pyntip ba ka jingthwet kala iaid shaid shaid mynta ban lapdien ia kine ki 5 ngut ki koidi kiba la lait phet.
“Ngin sa tohkit ia ki katto katne ki koidi phatok lashai ka sngi. Baroh kan mih ha ka jingtohkit,” la ong u Das bad bynrap ba ki pulit ki pynjur ia ka jingpyrshang ban kem ia kiba phet.
