Guwahati, Iaiong 05 : U nongmihkhmat ka BJP na Mariani ka Assam hynnin ka sngi u la kyntu ia u PM Modi ban pynpra noh ia ka Taj Mahal bad Qutub Minar kiba dei jong ki nongsynshar Mughal bad ban tei bujli da ka temple.
Haba kren sha ki lad pathai khubor, une u MLA ka BJP u Rupjyoti Kurmi u la ong, “Nga kyntu ia u PM Modi ba un phah pynpra noh ia ka Taj Mahal bad ia u Qutub Minar bad ban tei da ka temple kaba itynnad tam.”
Nalor kata une u MLA u la pynpaw ruh ba kine ki temple ki dei ban long ka jingtrei kaba paka bad kaba itynnad tam kiba yn ym don ki ban lah ban iabeh. Une u MLA u la kam ruh ba u la dep lypa ban noh synniang ia ka shi snem tulop ka jong u na ka bynta ban tei ia kane ka temple.
Ka Taj Mahal ka dei ka jingtei kaba kham phylla tam ba la shna da ki maw marbul ha Agra hapdeng ka snem 1631 bad 1648 lyngba ka hukum jong u nongsynshar ki Mughal u Shah Jahan shibynta ban kynmaw ieit ia la ka jong ka kurim.Kane ka dei ka jingtei kaba kynsan tam jong ki Mulim ha India bad kawei ruh kawei na ki jaka sahnam kaba itynnad tam ha ka pyrthei.
Ia u Qutub Minar la tei ha kaba sdang jong ka snem snem kaba 3, kata tang khyndiat kilomitar na Delhi, une u jingtrei ba la tei na ka khyndew shyiap saw u don ia ka jingjrong kaba 72.5 mitar.Marjan jong une u jingtrei ki don ki jingtrei ba la rim bad ba itynnad kum ka Alai-Darwaza Gate, ba l tei ha ki snem 1311, bad artylli ki mosque kiba kynthup ia ka Quwwatu’l-Islam, kaba dei kaba la rim tam ha ka thain shatei ka India.
Ha kawei pat ka bynta, ka National Council of Educational Research and Training (NCERT) dang shen ka la pynthymmai ia ki kot pule bad syllabud ki ban kwah ia ki skul ha baroh kawei ka ri.Ha ka kot history jong ka klas 12, ia ka “Themes of Indian Histori-Park 2’ yn ym kynthup shuh ia ki chapter kiba iadei bad ka Mughal empire.
Ia ka chapter ba la ai kyrteng ‘Kings and Chronicles; the Mughal Courts (C. 16th and 17th centuries)’ la weng noh na ka kot pule.Ym dei tang kane ka kot pule ia kaba la pynkylla. Ka NCERT ka la pynthymmai ruh ha kaba iadei bad ki katto katne ki poem bad ki paragraph na ki kot Hindi textbook.
Ia kine ki jingpynkylla da ka NCERT yn pyntreikam naduh kane ka academic session, kata mynta u 2023-2024.Nalor ki kot History bad Hindi, ia ka kot Civics na ka bynta ki klas 12 ruh la dep ban pynthymmai. Ia ki artylli ki chapter kiba kyrteng, ‘American Hegemony in World Politics’ bad ‘The Cold War Era’ la dep ban weng noh na ka kot. Kumjuh ruh ia ki artylli ki chapter na ka kot Class 12 ‘Indian Politics after Independence’ ruh la dep ban weng noh.
