Guwahati, May 13: U Myntri Rangbah ka Assam u Himanta Biswa Sarma ula ther tyngeh ia ka Myntri Rangbah duh barim ka ri (L) Indira Gandhi haba iakren bad ki nongthoh khubor kaba la long ha Vajpayee Bhawan ha Guwahati hynne ka sngi Baar.
U Himanta ula kynthoh pyrshah ia ka Indira Gandhi haba buh jingkylli halor ka jingshim ia ka rai ha ka por jong ka thma ha u snem 1971 (Bangladesh Liberation War_, khamtam eh ha kaba iadei bad ka “chicken neck” corridor bad ka rukom iakren pynbeit hadien ba la dep ka thma.
“Kaei ka jingmyntoi na ka jingthaw ia ka Bangladesh?” la buh jingkylli u Sarma. “Phim shym la shimkhia ia ka chicken neck. Phi lah dei ban pynkylla sha ka surok kaba biang, hynrei ngi la don ia ka ri kaba shit niam kum ki paramarjan ki jong ngi”.
U Sarma ula kynthoh jur ia ka Myntri Rangbahduh barim halor ka jingbym pyndonkam ia ka jingjop ka ri India iaka thma ban shim kum ki lad ban ioh jingmyntoi. “Lada dei ba ka Indira Gandhi ka dang im mynta, ngan kylli beit ia ka, Myntri Rangbahduh ka ri, ki shipai ki jong ngi kila jop ia ka thma, balei phi ailad ban thaw ia ka ri Islam hajan jingkhang jong ngi? Balei phim iakren ban ioh la kumno kumno 100 km ka jaka na ka Bangladesh khnang ban pyniasoh bha ia ka thain shatei lam mihngi bad ka ri India baroh kawei?.
Ula buh jingkylli ruh balei ia ka Simla Agreement kala pulom ha kaban ioh ia ka Pakistan-occupied Kashmir (PoK) na ka bynta ka India. “Phi lah pynkylla ia katei ka jingthrang jong ki shipai sha ka mon jong la jong kaba shimet, ban long ka nongialam kaba pdiang ia baroh ki niam. Phi lah dei ban dawa ban pynphai biang ia ka PoK bad ban ioh pyndonkam ia ka Sitakunda Port.”
Da kaba phaikhmat ia kane sha ka jingjia kaba dang shen jongka Operation, u Sarma ula iaroh ia u Myntri Rangbahduh ka ri halor ka jingpynphai kylla ia ki lehnoh. “Ka jingthmu jong ka Operation Sindoor kadei ban pynshitom ia ki lehnoh bad ia katei la lah ban pynurlong hapoh jong ka hynriew miet bad hynniew sngi, da ka jingpyniap ia ki 150 ngut ki lehnoh ha ka khyndew jong ka ri Pakistan,” ula ong.
Ula banjur ba ka jingiai bteng jong ka India ban ther kadei ka jingpynphai kylla ia ka Pakistan kaba ieng na ka bynta ki lehnoh.“Shisien ba ka Pakistan kala sdang sngewthuh ba kan shah pynjem khnap bad shah pynjulor, kala iakren noh bad u DGMO jong ngi. Mynta ka Congress kadei ban ong, Hato ka sorkar India kadei ban bteng ia ka thma wat haba ka Pakistan kala sdang kynran dien?.,
U Sarma ula pynkut da kaba kob kylla ia ka seng Congress, “Kaei kaba kila leh ha ka por ba ki synshar, haba ki lehnoh kila wan thombor ia ka ri India? Mynta ki kynthoh ia u Modi, hynrei ula pyni ba ka India kala pynbeit ia ka Balakot, Pulwama bad mynta ia ka Pahalgam. Ka Congress kadei ban khmih bniah hashwa ba kan kynthoh ia kiwei pat”.
