Guwahati, K’Lyngkot 18: U Myntri Rangbah duh ka ri u Narendra Modi ha ka sngi u Blei, u la ther tyngeh ia ka Liang Pyrshah, da kaba kynnoh ba ka buh jingma ia ka ia ka jing long tynrai jong ka Assam bad ka jingshngain jong ka ri da kaba pynshlur ïa ka jingwan rung tuh ki mynder na ka bynta ban myntoi ha ka elekshon.
Haba kren ha ka jingïalang paidbah ha Kaliabor, u Modi u la pynpaw ba ka jingïada ïa ka jinglong kyrpang, ka khyndew ka shyiap, bad ka pateng jong ka Assam ka dang long kawei na ki jingeh ba kongsan tam jong ka jylla. U la ïaroh ïa ka sorkar Assam ba la ïalam da ka BJP kaba la shim khia pyrshah ïa ki jingwan kyntur pud be-aiñ, da kaba pynpaw ba ki khlaw, ki lynti ïaid jong ki mrad khlaw, ki jaka ba pawnam bad ki jaka jong ki briew la ioh ban kam trai biang hadien ki phew snem.
“Da ki snem, la aiti ïa ka khyndew jong ka Assam ha ki nongwan rung tuh tang na ka bynta ki vote bad ban don ha ka bor,” la kynnoh u Myntri Rangbahduh, da kaba kynnoh ba ka jingwan rung tuh ka la nang kiew bha ha ka por ba synshar ka liang pyrshah. U la kynnoh ba ki nongwan rung tuh ki rung tuh na ki jaka khlaw bad ki lynti ïaid jong ki mrad, khlem da kheiñ ei ei ïa ka histori, ka kolshor ne ka jingngeit jong ka Assam” u la ong.
U Modi u la maham ba ka jingwan rung tuh ka ktah ïa ka jingbun briew jong ka Assam, “ka hiar thma ïa ka kolshor, ka jingknieh ia ki kam ki jam na ki baduk bad ki khun samla, bad ka jingshim jaka da kaba thok ha ki jaka riewlum.” U la ong ba katei ka mat ka buh jingma kaba khraw ym tang ia ka Assam hynrei wat ia ka jingshngain hapoh ka ri.
U Myntri Rangbah u la kynnoh ba ka jingthmu jong ka liang pyrshah ka long tang ban ïada ïa ki nongwan rung tuh ban ïoh biang ïa ka bor synshar, da kaba kyntu ïa ki paidbah ban long kiba husiar.Da kaba pyni nuksa ia ka Bihar, u Modi u la kam ba ki seng ka liang pyrshah hangtei ki la pynlong ïa ki jingïalang ban ïada ïa ki nongwan rung tuh, hynrei la kyntait beit ïa ki da ki nongthep vote.
“Ki paidbah jong ka ri ki jied ïa ka roi ka par bad ka jingsynshar kaba bha ban ïa ka saiñ pyrthei kaba sniew,” ong u Modi, da kaba pynpaw ïa ka jingshaniah ba ki nongjied jong ka Assam ba kin ai ïa ka jubab kaba kum kata.
Kane ka jingkren jong u ka wan hapdeng ka jingïakren saiñ hima sima kaba la nang jur ha ka thaiñ shatei lam mih ngi halor ka hok ha kaba iadei bad ka khyndew ka shyiap, ka jingwan buhai shnong bad ka jinglong kyrpang, ki mat kiba la sah kum ka phang pdeng ha ka saiñ hima sima jong ka Assam da ki phew snem.
