Guwahati, Nohprah 16: Ka Special Investigation Team (SIT) ki pulit ka Assam kala charge sheet ha kaba iadei bad ka jing khlad u nongrwai ba pawnam u Zubeen Garg, da kaba kam ba katei ka jingjia kadei kaba la suhbuit lypa.
Ia katei ki jingkynnoh, kaba la batai bniah ha ka charge sheet kaba don haduh 12,270 ka sla, la aiti hakhmat ka ïingbishar Chief Judicial Magistrate (CJM).
Katkum ka jingiathuh u prosecution kumba la kdew ha ka charge sheet, la kynnoh ba katei ka jingjia ka la jia ha ka 19 tarik u Nailur, 2025 ha kawei ka jaka harud duriaw ha Singapore.
Ka kynhun tohkit kala pyntip ba u Garg u khlem tip briew haduh 75 minit eiei, ha shwa ba un ioh jingiarap na ki doctor.
Ka charge cheet ka pynskhem ba ka jingdih kyiad palat ka la jia hashwa katei ka jingjia bad ba ki jingjia ki la jia ha ka jingialeh sngewbha kaba lah miet bad bud sa ka jingleit kai da ka jhad.
Ka SIT ka la jer kyrteng ia hynniew ngut ki briew, da kaba kynnoh ba ki don ki kam naduh ka jingpynbeit ia ka kyiad haduh ka jingpynshlur ia ka jingleh ba shyrkhei ha duriaw.
Ka charge sheet ka kam ruh ba ia ka kyiad la pynbiang hapoh ka jingpeit u Shyamkanu Mahanta, katba ha u Amritaprabha Mahanta la kynnoh ba la shaniah ban peit ia ka jingdih ba baroh shi miet.
Shuh shuh ki nongtohkit ki kynnoh ba la leh ïa ki jingdur ha ki por ba eh, ha kaba la lap katto katne tylli ki dur bad ki video na ki mobile phone jong ki briew kiba shah kynnoh.
Ki kot ki sla ki pyni ruh halor ka jingkynnoh donkti jong u Siddhartha Sharma, uba ki nongtohkit ki kynnoh ba u la pynshlur ia une u nongrwai ban ngam shapoh duriaw katba u dang buaid, ha kaba la kynnoh ba khlem ki lad jingiada kiba biang. Uwei pat u nongshah kynnoh, u Shekharjyoti Goswami, la kynnoh ba u la shah ia u Garg ban ngam shapoh um khlem kilife jacket.
Ka charge sheet kala kdew ruh ia u pulit ophisar uba la shah sospon u Sandipan Garg, uba dei u ba ha jong une u nongrwai,ha kaba la ïathuh ba la pynngat ïa u ha ka kyndon aiñ 105 jong ka BNS.Ki tyllong khubor la kdew ha ka report ki pynpaw ba u lah ban kylla long u nongmynjur ha kaba iadei bad kane ka case, watla kane ka dang sah ha ka jingpeit bniah jong ka ïingbishar.
Ki heh pulit ki la pynpaw ba katei ka charge sheet ka pyni ia ki jinglap jong ka kynhun tohkit bad ki jingkynnoh ba la lum ha ka jingtohkit kaba 83 sngi, bad ba katei ka kam ka don mynta ha khmat ka iingbishar.
Ki stad aiñ ki kdew ba baroh kiba shah kynnoh la shim ba kim don pop haduh ban da pynshisha ba ki donkti, bad ïa ki jingkynnoh ba la kdew ha ka charge sheet yn sa tynjuh ha ka por ba bishar.
Kane ka case ka la saphriang bha ha kylleng jong ka Assam, ha kaba la khmih lynti ba ka ïingbishar kan shimkhia ïa kane ka kam bad kan buh tarik ban bishar bniah ha ki sngi ban wan.
 ki pulit ka Assam kala charge sheet ha kaba iadei bad ka jing khlad u nongrwai ba pawnam u Zubeen Garg, da kaba kam ba katei ka jingjia kadei kaba la suhbuit lypa.){kind=link}