Guwahati, Lber 11: Ki pulit ka Assam ki la lap ia kawei ka jaka kaba khaïi ia ki syrnot sngi kha thok bad ki la ioh ban kem ia uwei u briew uba donkti ha kane ka kam na South Salmara, Mankachar district ha ka sngi Nyngkong.
Ïa une u briew ba la kem da ki pulit la tip kyrteng kum u Zohirul Islam (49) snem ka rta.
Ki Pulit, hadien ba la ioh jingtip halor kane ki la pynlong ia ka jingkhynra bad talasi ha ka sngi Nyngkong ha Baghapara bou bazar kaba hap hapoh Kalapani outpost ha Mankachar police station.
Ha ka jingkhynra ia ka iing sah jong u Zohirul Islam, ki pulit ki la ioh kurup ia ki kot ki sla bad ki tiar kiba la shna thok na ka bynta ban shna ia ka syrnot sngi kha khun.
Ki kot ki sla bad ki tiar kiba la ioh ban kurup ha ka por ba pyntreikam ki long- 50 tylli ki syrnot sngi kha thok (electronic), 27 tylli ki jingthoh ba la thoh da ka kti ryngkat ki muhor hospital), 11 tylli ki syrnot iap ba thok, 134 tylli ki Aadhaar card, 11 tylli ki PAN card, 25 tylli ki Voter ID card (ba la suba ba ki dei kiba thok), 3 tylli ki SBI ATM cards, 8 Tylli ki PNB ATM Cards, 1 Canon printer bad shi rim ki kot xerox rong pink.
“Ïa ka jingtalasi la pynlong ha ka jingdon lang ki sakhi ba laitluid bad la ring video. La suba ba ka dei ka network thok jong ki kot ki sla. Ka jingtohkit halor kane ka dang ïaid sha khmat bad la kem ïa uwei u briew ha kaba ïadei bad kane ka kam,” ong uwei u heh pulit.
