Guwahati, Naiwieng 12: U Myntri Rangbah ka jylla Assam u Himanta Biswa Sarma ha ka sngi Balang u la ong kito ki bym ju rwai ia ka jingrwai Vande Mataram kin ym lah satia ban long kum ki nong India, da kaba ban jur halor ka jingdonkam jong ka snap kum ki nong shong shnong ka ri bad ruh ban peitngor pyrshah ia ki briew kiba kwah ban pynjot pynpra.
“Mynshwa ngi ngeit ba ka jingnang jingstad kan pynduh jait ia ka jingleh palat pud, hynrei mynta ngi iohi ba ka jingnang jingstad teng teng ka pynlong ia ki briew kiba kham shyrkhei shuh shuh.Haba ki don ki briew shimet kiba kylla long Doctor, ki kham lah ban pynmynsaw shuh shuh”, ong u Sarma sha ki lad pathai khubor.
U la pynpaw ba ka jinglong ba ïaineh na ka bynta ka ri ka paw lyngba ka jingburom ia ka Bharat Mata.”Ka jinglong ba shisha jong u briew kam ju kylla.Kito ki bym rwai ia ka jingrwai Vande Mataram kin ym lah satia ban long ki nong India ba shisha. Lada kim don jingsngew ba ka Bharat Mata ka dei ka kmie jong ki, kin ym lah ban long ki nong shong shnong jong kane ka ri.Namar kata, ngi dei ban long kiba husiar,” la ong u myntri rangbah.
Shuh shuh u Sarma u la kynthoh ba tang ka jingnang jingstad kan ym lah ban pynwan dur ia ka jinglong jong u briew.”Ka jingngeit ba tang ka jingnang jingstad ka lah ban weng ia baroh kata te kadei kaba bakla, namar ba lada u briew u buh rieh ia ka jingthmu ba sniew, ka jingnang jingstad kan dang pynlong ia u ban dang leh shuh shuh ia ki kam bymman bad kiba bakla.Ka jinglong ba la nang la stad kan ym pynthikna ban don mano re mano kiba leh ia ki kam babha,” u la bynrap.
Haba ïadei bad ka case ba dang shen kaba ïadei bad uwei u doktor uba la shah kem, u Sarma u la kynnoh ba u la donkti ha ki “kam pyrshah ri” ne “anti-national activities” naduh ki por ba u dang pule ha college.
“U la phla ba u la set ne (trap) ïa ki khynnah kynthei Hindu bad pynlong ïa ki ban shongkurim bad ki shynrang Muslim, kaba la pynlong ïa ki ban kylla niam. Kum kine ki jingjia ki pynkynmaw ïa ngi ban long kiba husiar — la ka long ha Pahalgam ne ha Delhi, man la ka jingjia ka long ka jinghikai ban long kiba husiar bad kiba ïatylli,” ong u Sarma.
