Guwahati, Iaiong 25 :Ka nongialam ka Congress kaba la shah beh seng, ka Angkita Dutta ka la ong ba ka jingshisha kan sa paw pyrthei ha kaba iadei bad ki jingkynnoh kam thombor ki jong ka pyrshah ia u president jong ka Indian Youth Congress (IYC) u Srinivas BV.
“Ki jingshisha kin sa paw.Ka jingujor ka jong Nga kam dei pyrshah ia ka party hynrei ia u briew shimet uba kyrteng u BV Srinivas, uba la pyndonkam bakla ia ka bor ka jong u,” ong kane ka nongialam barim ka Assam Congress lyngba ka lad pathai khubor.
Nalor kata ka Dutta ka la pynshai ruh ba kam don satia ia kano kano ka jingthmu ban pyniasoh abd ka seng BJP, da kaba ong ba ka kyrmen ba ka party Congress kan sa pynbeit halor kine kiei kiei baroh.
“Nga wan na ka longiing kiba dei tynrai na ka party Congress mynta la saw pateng. Ngam sngewthuh biang biang ha kaba iadei bad la ka jong ka kamram bad ka jingkitkhlieh na ka bynta ka party Congress.La pynheh pynsan ia Nga halor ki nongrim kiba la shon shap da ka seng Congress,” ka la ong shuh shuh.
Ka Dutta ka la ong ruh : “Ngan dang iai bteng ia ki kam bhalang tad haduh ba ka party kan sngewthuh ia ki mat ki jong nga bad ba kan shimkhia kham shuh shuh ha kaba iadei bad kane ka jinglong jingman baroh.”
Ka Angkita Dutta dang shen ka la shah beh noh na ka seng congress na ka bynta hynriew snem kynthoh halor ki jingkynnoh ialeh pyrshah seng, kata hadien ba ka la ujor FIR hapoh Dispur police station ha Guwahati pyrshah ia u Srinivas BV da kaba kynnoh pyrshah ia u halor ki kam thombor pyrshah ia ka mynta lah hynriew bnai kynthih, kata kaba kynthup halor ka jingktahkti bad ka jingbanbor kaba la ktah jur ia ka bor pyrkhat pyrdain ka jong ka.
