Dibrugarh, Iaiong 18: Ha ka jingbteng ban khynra ia ki kam pynkhalai be-ain na ka jingialehkai Indian Premier League (IPL), ki pulit ka Dibrugarh ki la lap ia kawei ka jaka iathong bad ki la kem ia 2 ngut na ka thain Seujpur.
Kine ki briew kiba la shah kem ki kynthup u Anil Kabri bad u Deepak Sahu kiba dei ki nongshong shnong jong ka Dibrugarh.
Ka khubor na ki pulit ka kynnoh ba kine ki 2 ngut ki la pynïaid ïa kane ka kam iathong pisa la shibnai tam da kaba pyndonkam da ki nongpynïaid pdeng ban pynngop ïa ki nongïashim bynta ban iathong pisa.
Ia kine ki jingkem hapoh ka jingpeit jong ka Gabrupathar Police Outpost.
Haba kren halor kane u Superintendent of Police ka Dibrugarh u Rakesh Reddy u la ong, “Ngi la kem ia 2 ngut ki briew ha kaba iadei bad ka jingleh thok ia ka IPL. Ngi la kurup ruh ia ki mobile phone jong ki bad kawei ka kali ba don ia u number AS 23 AE 7789″.
U SP Reddy u la ong ba ka jingtohkit ka dang ïaid shakhmat bad ki jinglap ba nyngkong ki pyni ba ïa kane ka kam beain la pynïaid ha ka rukom kaba ïatreilang ha Dibrugarh.
Ki tyllong khubor ki la pynpaw ba ïa ka jingïathong beain pisa jong ka IPL ha ka district la ju pynsuk lyngba ki nongpynïaid pdeng kiba pynngop ïa ki samla, khamtam ha ki por janmiet ha kaba ki hotel bad ki bar ki ju dap briew.
“Bun ki riew shimet kiba iathong pisa kim don iaka jingsngewthuh shaphang kane ka jingïathong pisa hynrei ki shah khring ha ka jingkular ban ïoh pisa da kaba suk” ong u heh pulit.
