Dibrugarh, K’lyngkot 18: Ha ka jingpynlong ia ka jingkhynra hynne ka sngi Saitjain, 13 tylli ki par dewiong thliew khnai kila shah khang khyrdep kiba don ha ka Bittu Pahar jongka Namdang, Eastern Assam, Tinsukia District.
Ia kane ka jingkhynra la sdang ha ka por 8.30 mynstep da ki heh ophisar kiba kynthup ia u Executive Magistrate ka Margherita co-district u Pritom Gogoi, u Superintendent of Police ka Tinsukia u Abhijit Gurav, ki heh ophisar jongka North Eastern Coalfields bad Assam Power Distribution Company Limited.
La kem ruh ia ki 3 ngut ki nongtih dewiong katba ki dang tih dewiong ha ki par dewiong thliew khnai bad kine mynta kila don ha ki kti jong ki pulit.
Nalor kane la pynduh noh ia ki sainar elektrik kiba la pyndonkam ha katei ka jaka tih dewiong bad la kurup ruh ia ki kor ki bor kiba la pyndonkam ha katei ka jingkhynra.
“3 ngut ki nongtih dewiong kila shah kem ha ka por ba ki dang tih dewiong bad la bat noh shwa ia ki. Ngi lah pynduh noh ruh ia ki tiar elektrik kiba la pyndonkam ha katei ka jaka bad ngi lah kurup ia kiba bun ki tiar elektrik ha ka jingkhynra. Ngin dang iai bteng ia kum kane ka jingkhynra” la ong u Pritom Gogoi.
Dang shen ka kynhun myntri jong ka sorkar Assam kaba la long ha ka 16 tarik u Kyllalyngkot ha Morigaon, kala rai ba dei ban khang khyrdep noh shi rta ia baroh ki par dewiong thliew khnai kiba don ha ka North Eastern Coalfields jongka Assam bad yn sa pynmih ruh ia ka kyndon treikam ne SOP ha kaba iadei bad kane.
Ia katei ka rai la shim hadien ba kala don ka jingjia hapoh ka par dewiong thliew khnai ha Umrangso, Dima Hasao, ha kaba bun ngut ki nongtih dewiong kila duh noh ia ka jingim ka jongki.
Ki nongshong shnong kiba don ia ka jingsngewkhia kila pynmih ia ka sur pyrshah ia ka jingtih dewiong be-ain hynrei kala paw pat ba ka tnad ne ki bor pyniaid district kim shym la shimkhia satia ia ka jingtih bad jingpyniaid be-ain ia u dewiong ha katei ka jaka.
U Ranjan Chowdhury, uba long u nongshong shnong uba la pynpaw iaka jingsngewkhia dang shen ha ka Youtube Channel ula pyrshah jur ia kaj ingtih dewiong thliew khnai ia kaba kam shym la don kano kano kano ka jingpyrkhing ha ka thain Margherita-Ledo jongka Tinsukia district.
“Ka jingtih dewiong be-ain kadei ka kam sniew kaba la leh bad pyniaid da ki ‘Coal Mafia’ ha ryngkat ka jingioh ia ka jingiarap na ki politishan kiba bamsap. Man la ka sngi ki trok kiba kit ia u dewiong be-ain ki iaid na ki surokbah hynrei ym shim la don mano mano ruh kiba nud ban pynsangeh ia ki” ula kynnoh.
