Guwahati, Lber 18: Ha ka jingiakhun pyrshah ia ki kam tuh kam thiem, ki pulit ka Assam ha ka sngi 17 tarik mynta u bnai Lber kila kyndang bad khynra naphang ia ki kam tuh kali ha kaba kila ioh ban kurup haduh 13 tylli ki bike tuh bad kem ruh ia 11 ngut ki nongtuh, ba kynthup ia ki katto katne ngut na Manipur.
Ia kine briew kiba la kem da ki pulit la tip kyrteng kum u Gaingamlung Golmei bad u Heibokmayum Monouwar na ka thain Thoubal jong ka Manipur, U Inamul Ali na Rangia, u NK Naga Naomi, U Raju Sankhare, Leivon Sangte Kom, U Muhammad Akbar, M Nemneithem Haokip na Manipur Tengnoupal, U Lunjapao Doungel na Churachandpur ka Manipur, u Jangminthang Haokip na Kangpokpi Na Manipur bad u Paomoija Haokip na Manipur Senapati.
Ki pulit kila ioh ruh ban kem ia u wei u briew uba don ka jingiadei ne linkman, uba don ruh ia ka bynta ba kongsan ha kaba iadei bad kane ka kam runar uba dei na Goalpara
U wei u heh ophisar haba kren u la ong, “Ha ka jingtohkit, kine ki briew kila phla ba u briew ba lam khmat uba don ka jingiadei bad kine ki kam tuh u la aiti ia ki bike ba la tuh na Assam sha kawei ka kynhun runar kaba don ha ka jylla Manipur lyngba u briew ba lam khmat ba don ka jingiadei bad ki briew ba na katei ka jaka,”.
Shuh shuh une u heh ophisar u la ong, “Ki pulit ki la ioh kurup 13 tylli ki bike ba la shah tuh ryngkat bad kawei ka Scorpio bad ar tylli ki Thar SUV”.
“Na ka jingtohkit ki pulit kila lap ksai ruh ba kane ka kynhun jong ki nongtuh ki pyntrei kam da ka jingstad kaba khraw bad ki buh ia ka thong ba ha khmat eh ban tuh ia ki bike Royal Enfield namar ba kan shim por tang hapoh 45 sekhon ban tuh iaki” u la ong.
Kane ka kynhun jong ki gang tuh ki pyndonkam da kaba shong da ka liengsuiñ sha Guwahati bad wad ïa ki jaka sah ba shipor na ka bynta saw ne san sngi ban pyndep ïa ki kam tuh jong ki.
Katkum ki tyllong khubor la iathuh ba hadien ki kam tuh kam thiem u riew khmat jong kane ka kynhun u die ia ki kali ba la shah tuh sha Myanmar ban pateng die biang bad dang shen ki pulit ki la ioh ban kem bun ngut ki nongkit bike na ki jaka bapher bapher jong ka jylla Assam bad kurup bun ki bike ba tuh.
Shuh shuh ka tyllong khubor na ki pulit la iathuh ba, “Kane ka kynhun runar ki treikam ha ka rukom ba shalak namar ba hadien ba kila dep ban tuh, ki die kylla biang ia ki kali bad kane ka kynhun kadei ka heh bha ba treikam hapoh ka nongbah”.
