Dhubri, Jymmang 12 : Ki Pulit ka Assam hynnin ka miet shiteng synnia, kila ioh kem ia uwei u briew ba kyrteng u Sahinur Islam, uba sah ha Dhirghat bad ioh kurup ia ka pisa thok ba kot haduh T.2 klur na ka met jong u. Ia une u briew la iohkem na Chapar.
Halor ki jingtip ba thikna, u Circle Police Officer ka Chapar bad u Police In Charge ka Chapar Police Station, kila pynlong ia ka jingkhynra ia ka iingsah u Sahinor Islam ha Dhirghat kaba hap hapoh Chapar ha Dhubri District.
U Heh Pulit u pyntip ba u Islam u don jingthmu ban pyniaid iew ia kane ka pisa thok da kaba ia bujli bad ka pisa shisha ba T. 7 lak.
Ki Pulit kila pynlong ruh ia ka jingkhynra ha kylleng ki jaka ban ioh kem ia ki paralok ba iatreilang bad u Islam.
Lah ban kdew ba ka jingpyniaid iew ia ka pisa thok ka jur bha ha Dhubri District kaba don ha khappud ka Bangladesh. Dang shen ki Pulit bad BSF kila ioh kem ia bun ngut ki briew halor ka kam khaii pisa thok.
