Guwahati, Lber 27: Ki pulit ka jylla Assam ki la ioh ban kem ia u wei u nongsuhbuit uba donkti ha ka jyrsieh khaii online bad kila wanrah noh ia u sha Sribhumi district jong ka jylla Assam.
Ia une u nongsuhbuit jong katei ka kam khaii online la tip kyrteng kum u Mohammad Shakir.
Katkum ki kaiphod, u Shakir u dei u nongshah kynnoh ba ha khmat eh ha kaba iadei bad ka skhim thok pisa da kaba peit khmat kyrpang ia ki nongbei tyngka ha Barak Valley bad Sribhumi. Une u Shakir u la phet rieh ia lade la bun bnai, la ong ka kaiphod.
Hadien ba ki la ioh jingtip na ki nong syntiat, ka special task force jong ki pulit ka Badarpur ka la ioh ban kem ia u Shakir bad ia u hynmen jong u, u Mohammad Jabir, na Mukundapur kaba hap hapoh ka Jadavpur Police Station ha Kolkata.
Hadien ba la kem ia baroh arngut ki pulit ki la pynkit ia ki sha Sribhumi, ha kaba ki pulit ki dang tohkit ia ki mynta.
Katkum ka jingiathuh jong ki pulit la ong ba u Shakir u la thmu ban leh ia ka kam thok ban pynngop ia ki nongbei tyngka da kaba kular ban ioh ia ka jingmih kaba bun bha.
Da kane ka kam buit tuh, u Shakir u la ioh ban sei pisa haduh 150 klur tyngka shwa ban phet sha Kolkata, u Shakir u dei u nongsuhbuit ba sha lyndet jong kane ka jingleh thok da kaba thmu ban pynlong lang knia ia ki briew kiba duk jong ka Sribhumi, la ong uwei u heh pulit.
