Guwahati, K’lyngkot 31: Ki Pulit ka Assam kila kem ia uwei u khynnah uba donkti ban pyniap dusmon ia kawei ka khynnah kynthei ba dang 6 snem ka rta, ha Barpeta District ka Assam.
Tang hapoh 48 kynta ba sdang ka jingtohkit, ki Pulit kila ioh ban kem noh ia u khynnah ba donkti.
Ia ka met jong kane ka khynnah la lap bala song bha ha ka borni hapoh ka iingsah jong une u briew, kaba don ha Baghbar Mouripam.
Kane ka khynnah kala jah rngai naduh ka 25 tarik K’lyngkot katba ka dang ialehkai bad arngut ki paralok. Ha ka sngi kaba bud, ki bahaiing kila leit pyntip ia kane ka jingjah rngai ha Baghbar Police Station.
Ki Pulit kila pynkhlain bha ia ka jingtohkit bad ha ka 29 tarik K’lyngkot, kila lap noh ia ka metiap ha ka iingsah jong une u briew.
Ki Pulit kila register case pyrshah ia utei u briew hapoh ka POCSO Act. La iathuh ba une u briew ula leh beijot ia kane ka khynnah shuwa ba un pyniap. Ki Pulit kila ioh kurup ruh ia ka tiar ba u pyndonkam ha ka ban pyniap ia kane ka khynnah.
Hadien ba leit rah tian bishar ia u ha Barpeta, ka Iingkashari kala phah noh ia une u khynnah sha ka Juvenile Observation Home kaba don ha Boko.
