Assam : Kem ki Pulit ia u Khliehduh ki ISIS ha India bad u Nongbud na Assam

0
139

Guwahati, Lber 20 : Ki Pulit Special Task Force (STF) ka Assam, kila ioh kem ia arngut ki dkhot ka ISIS ba kynthup ia u Khliehduh ka ISIS ha India. Ia kine ki arngut la kem na ka thain Dharmasala jong ka Dhubri, Assam.

Kine ki dkhot ka ISIS ki kyrteng u Haris Farooqi ba khot sin u Harish Ajmal Farukhi, uba dei u Khliehduh ka kynhun ha India bad uwei pat u kyrteng u Anurag Singh ba khot sin u Rehan.

Kine ki arngut ki don ha ka thup wanted jong ka National Investigation Agency. Kine kila wan rung tuh na Bangladesh lyngba ka khappud ha Dhubri, Assam.

Ki bor syntiat ka India kila ioh jingtip ba kine ki arngut ki dkhot ka ISIS ha India kiba sah ha ka Ri ba marjan, kin sa wan rung sha India lyngba ka Dhubri ban leh ia ki kam pyntriem.

Halor ka jingioh khubor, ka kynhun STF ba ialam da u Parthasarathi Mahanta, IGP (STF), kala pynlong ia ka jingkhynra ha ka janmiet sngi Ba-ar na Dhubri bad hynne ka janmiet por 4:15 baje, ia kine ki arngut la ioh ban kem na ka thain Dharmasala hadien ka jingjam na shiliang pud.

Ia kine ki arngut la wankit noh sha ka Ophis ka STF ha Guwahati. Ha ka jingtohkit la lap ba u Haris Farooqi u dei u khun jong u Ajman Farooqi ba na Chakrata, Dehradun bad u dei u khliehduh ka ISIS ha India.

U Anurag Singh u dei u khun jong u Manbir Singh ba na Diwana, Panipat. Ula kylla niam ialade sha ka Islam hadien ba u ioh ia ka kurim kaba dei ka nong Bangladesh.