Guwahati, Nailur 24: Ki Pulit jong ka Margherita kila ioh ban kem ia kawei ka kynhun khaii tuh ia ki kali da kaba pynbiej bad pynngop ia ki trai kali ban iateh kular thok, tang ban die noh ia ki kali jong ki sha kiwei pat ki jylla khlem ka jingmynjur ki trai.
Haba shimkhia ia ka jingujor, ki pulit ha Ledo kila kem noh ia u wei u briew uba la shah kynnoh bad ia une u briew la tip kyrteng kum u Dipak Jha, ia kaba la kynnoh ba u dei u dkhot ba kongsan bha jong kane ka kynhun runar.
“Ka rukom treikam jong kane ka kynhun ka thmu beit ïa ki trai kali saw shaka, khamtam eh ïa ki kali Bolero, da kaba kular ban siew ïa ki EMI jong ki bank lane ban siew bai wai man la u bnai. Hadien kane, ia kine ki kali la die lyngba ka jingpynkylla thok sha kiwei pat ki jylla,” ong uwei u heh pulit.
Shuh shuh ka tyllong khubor ka la pynpaw ba palat 100 tylli ki kali la dep ban lum bad die da katei ka kynhun sha kylleng ki khappud jong kiwei pat ki jylla.
Ha ka jingkhynra ha ka miet sngi ba-ar, ki pulit kila ioh ban kem ia u Jha na Tinsukia bad na u la ioh ban kurup ia ki jingtip ba bniah jong ki katto katne ki kali ba la die beain.
Lait na u Jha, la suba ruh ba kawei ka kynthei ka donkti lang ha katei ka kam runar bad la iathuh ba ka la phet rieh ryngkat bad katto katne tylli ki kali la slem bha.Ki pulit kila pyntikna ba katei ka jingleh thok ka lapaw hadien ba la ujor palat 30 tylli ki jingujor pyrshah ia kiba shah kynnoh.
