Guwahati, Risaw 27: Ki pulit jong ka Dispur kila kem ia phra ngut ki briew kiba ia don ka jingiadei bad ka Lachit Sena halor ka jingkynnoh don kti ban rahbor bad dawa pisa bad kila ioh ruh ban pyllait im ia u briew uba la shah rahbor na shabar jong ka Pratiksha Hospital ha Borbari, Guwahati, ha ka sngi u Blei.
Kine ki briew kiba la shah kem la tip kyrteng kum u Biswajit Doley, Injamul Haque, Rohan Ali, Mogan Borah, Nitu Ahmed, Chinmay Dev, Riyaj Ahmed, bad u Biraj Ballav Kalita.
Katkum ki pulit, katei ka jingjia ka la jia ha ka por kumba 9:30 baje eiei mynmiet, ha kaba uwei u Ershad Khan, uba dei u nongshong shnong jong ka Goalpara, u la pyntip sha ki bor pyniaid ba ia u paralok jong u, u Rahul Mishra, la rahbor da ka kynhun jong ki briew kiba don 10–15 ngut kiba ym lah ban ithuh satia. La iathuh ba ki nongrahbor ki la dawa pisa haduh T.15–20 lak na ka bynta ban pyllait ia u Mishra.
Ka kynhun na Dispur Police Station ki la pynlong ia ka jingkhynra bad wad bniah bad kila lap ksai ia kitei ki runar haduh Tribeni Path. Ia une u lanot la lap ba u sahkut hapoh ar tylli ki kali kiba don ia u number AS01 EM 0718 bad AS23 Q 3566.
Halor kane, Ki pulit ki la kem ia hynriew ngut na ki nongrahbor ha katei ka jaka, katba arngut pat la kem hadien ha ka por ba ki dang pynjur ia ka jingkhynra miet.
Ha kane ka jingkhynra, ki pulit ki la ioh ban kurup ar tylli ki Baseball bat, uwei u dieng Hockey, kawei ka wait arliang, ar tylli ki pepper Spray, bad 6 tylli ki Mobile Phone.
Ha kajuh ka por ki pulit ki la sdang ïa ki jingtohkit katkum ki bynta bapher bapher jong ka aiñ, kynthup ïa ka jingrahbor, ka jingdawa pisa, ka jingpyntieng pynsmiej, bad ki kam be-aiñ.
Haba kren sha ki nongthoh khubor, u Myntri Rangbah ka jylla Assam u Himanta Biswa Sarma u la ong, “Ka Veer Lachit Sena ka la thaw ïa ka jingkulmar ha ka kyrteng jong ki kam kolshor bad ki jingai jingïarap lyngba ka pisa, bad kila wanrah ruh ïa ka jingpynjot ïa ka mariang.Lada donkam, ngi lah ban hap ban pyrkhat ban khang, kumba long ia ka ULFA (I).”
