Guwahati, Naiwieng 03 : Ha ka jingiakhun pyrshah ia ki riewbymman kiba shukor briew lyngba ki kor Internet (Cyber Criminal), ki Pulit ka Assam kila ioh kem ia 5 ngut kine ki riew bymman na Morigaon District ka Assam ha ka sngi Palei.
Ki Pulit kila ioh kurup ruh ia bun bah ki kot ki sla ba shu shna thok na ka met jong kine ki briew.
Hadien ka jingioh ia ki jingtip ba thikna, ki Pulit kila pynlong ia ka jingkhynra kaba jur ha sor Moirabari jong ka Morigaon bad kila ioh ban kem ia kane ka kynhun.
Kine ki san ngut ki kyrteng u Assadul Islam, Umar Saddique, Jahangir Ali, Wassim Akram bad Majaharul Islam.
Kat kum ka jingong ki Pulit, ia kine ki briew la kem bad pynngat ha ki kyndon ba shukor ia ki briew da kaba pynbiej ba kin ai ram lyngba ki kor Online.
“Ha kiba bun ki khep, kine ki briew kila apthap ia ki briew kiba kwah ban ioh suk ia ka ram. Bun ngut ki briew kila ngat ha ka jingpynngop kine ki riew bymman” ong ki Pulit.
Ha kajuh ka por, ki Pulit ka Crime Branch ka Assam, kila register ia bun tylli ki case shukor lyngba ki kor internet hapoh ka Jylla bad ka jingtohkit mynta kala iaid shakhmat.
Dang shen, ki Pulit kila ioh ban kem ia uwei u nongsuhbuit ba pyniaid ia ka call centre thok ha Guwahati la palat arsnem nalor ki 191 ngut kiba la ioh ban kem na kylleng ki jaka jong ka Ri.
