Dibrugarh, Naitung 24 : Ki Pulit ha ka janmiet sngi Saitjain, kila kem ia arngut ki briew jong ka ULFA kiba donkti ha ki kam dawa pisa jubor bad ia kine ki briew la kem ha ka jingkhynra bala pynlong marjan ka Dibrugarh University kaba don ha Eastern Assam.
Kine ki arngut ki kyrteng ka Pushpanjali Gagoi uba dei na Dihing, Tinsukia bad u Hema Chetia uba dei na Khowang.
Ha kane ka jingkhynra, ki Pulit kila ioh ban kurup haduh T. 3 lak ka pisa bala dawa jubor da ka Pushpanjali lem bad T.164000 na u Hema Chetia.
Haba iakren bad ki nongthoh khubor, u Superintendent of Police ka Dibrugarh Shwetank Mishra ula ong ba ki Pulit kila ioh jingtip halor ka jingdawa pisa na ki nongkhaii. Ka kynhun ki Pulit ha ryngkat ki shipai kila pynlong ia ka jingkhynra hajan Dibrugarh University bad kila kem ia kawei ka briew ka ULFA lem bad uwei u briew uba dei u ehrang barim ka ULFA.
U Mishra u pyntip ba ha ka jingtohkit, u Hema Chetia ula pyntip ba ka dang don bun ka pisa ba dawa na ki nongkhaii, kaba dang don ha ka Iingsah jong u. Ki Pulit kila hiar ban leit khynra ia kane ka Iing ha Tingthengia gaon bad une u briew ula pyrshang pynban ban pyni bor da u kynja grenade bad ki Pulit kim banse ban siat ia u na ki bynta ka kjat ban tehlakam ia u.
U SP u ong ba ha ka jingtalasi ia ka iing, kila ioh ban kurup ia u grenade ba shna da u kynja bilor bad ka pisa ba T.10,000. U Chetia ula phla ruh ba u dei u ehrang barim ka ULFA.
Pule ruh: Mih ka jingkulmar ha NEIGRIHMS ba iap u Samla ba mynsaw takhuh kali
