Assam | Kem ki Pulit Assam sa ia uwei u lehnoh ABT ka Bangladesh na Dhubri

Guwahati, K’Lyngkot 21: Ha ka jingbteng ban khynra pyrshah ïa ki lehnoh Jehadi, ki Pulit ka Jylla Assam ki la ïoh ban kem sa ïa uwei uba don jingiadei bad ka Ansarullah Bangla Team (ABT), ka kynhun lehnoh ba don ha Bangladesh ba don jingïadei bad ka Al-Qaeda in the Indian subcontinent (AQIS).

Da ka jingioh kem sa ïa uwei, ka STF haduh mynta ka la ioh ban kem ia 14 ngut kiba don jingiadei bad ka ABT na Assam, West Bengal bad Kerala.

“Kum shi bynta ban pyntreikam iaka ‘Operation Praghat’ pyrshah iaki Global Terrorist Organizations (GTO), la kem sa uwei pat u Jehadi/lehnoh Islam ïa uba la tip kyrteng kum u Ajibar Rahman (31 snem) na Dhubri, ka District Assam, kaba don ha khappud bad ka Bangladesh lem bad ka West Bengal” ong uwei u heh Pulit ka Assam.

U la ïathuh ba na kitei ki 14 ngut kiba la shah kem, uwei udei na Bangladesh bad ki trei hapoh ka jingpynïaid jong u Md Farhan Israk uba ïajan bha bad u Jasimuddin Rahmani uba dei u Heh jong ka ABT.

Ka ABT ka la phah ia uwei u nong Bangladesh uba tip kyrteng da u Md Sad Radi ba ju khot sin u Shab Sheikh uba shong basah ha Rajshai, Bangladesh ban pynsaphriang ia ka jingmut ba sniew hapdeng ki briew kiba don kajuh ka jingmut jingpyrkhat ha kylleng ka ri India.

“Kumba ki sakhi ki pyni ïa ki kam jong ki la pynlong da ka jingthmu ban pynkhreh bad kyntiew ïa ka jinglah treikam jong ki jong ki kynhun lehnoh kiba thmu ban pynthut ïa ka jingshngaiñ bad ka jingsynshar jong ka ri. Ka jingtohkit ka la ïaid shakhmat ban lap ïa ka jingïadei baroh kawei kaba la saphriang kylleng ka Ri” la ong u nongaiktien.

Ha ka 18 tarik mynta u bnai ki STF ha ka jingkhynra kaba jop ki la kem ïa u Jaheer Ali na Dhubri ha ka thaiñ sepngi jong ka Assam.

Ha ka 30 tarik u Nohprah la kem ïa u shipai ABT u ba la tip kyrteng da u Gazi Rahman (35 snem) ryngkat ka jingïarap jong ki Pulit ka Kokrajhar.