Guwahati, Lber 14: U Myntri Rangbahduh ka ri u Narendra Modi ha ka sngi saitjaiñ u la plie bad buh ïa ki mawnongrim na ka bynta ki projek kam pynroi ba bun kiba shongdor haduh ₹23,550 klur ha Silchar, Assam, bad ong ba kine ki project kin pynkylla ïa ka Barak Valley sha ka jaka pdeng jong ka khaïi pateng kaba kongsan na ka bynta ka thaiñ shatei lam mihngi bad pynkhlain ïa ka Act India’s Act East Policy.
Haba kren ha ka jingialang ha Silchar, u Modi u la ong ba ka Northeast India ka la kylla long ka jaka pdeng jong ka India’s Act East Policy, kaba treikam kum ka jingkieng kaba pyniasoh ia ka ri bad ka Southeast Asia.
Haba pynsngew ïa ki jingtei ba kongsan, u Myntri Rangbahduh u la pynpaw ba ka bynta ka surok bah kaba shongdor haduh ₹24,000 klur na Shillong–Silchar High-Speed Corridor, ka surok bah kaba lah ban tehlakam ïa ka jingïoh rung kaba u la ong ba kan pynbha shibun ïa ka leit ka wan sha Mizoram, Manipur bad Tripura kum ka lynti ba thymmai sha ki iew jong ka South Asia.
“Ka Barak Valley kan sa kylla long ka jaka pdeng jong ka khaïi pateng kaba kongsan na ka bynta ka thaiñ Shatei Lam Mihngi,” ong u Modi haba bynrap ba ki projek ha ki surok, ki lynti rel bad ka pule puthi kin thaw ïa ki lad kamai kiba thymmai na ka bynta ki samla jong ka thaiñ.
Napdeng kiwei pat ki jingthmu, u Modi u la pynpaw ïa ka jingtei ïa k fly over ba thymmai ha Silchar ban pynduna ïa ka jingdheng kali bad ka jingpynpoi bording ïa palat 2,500 km jong ka lynti rel jong ka Assam, kaba u la ong ba kan pynlah ïa ka leit ka wan kaba kham stet bad kaba khuid.
U Myntri Rangbahduh u la ban jur ruh ba ka jingnoh synniang jong ki nongtrei kper slasha bad ki nongrep ha ka roi ka par jong ka Assam, kaba la kot palat ₹20,000 klur la pynkylla sha ki nongrep ha ka jylla hapoh ka PM-Kisan Samman Nidhi scheme.
U la pynbna ruh ban seng ïa ka Agriculture College ba nyngkong eh hapoh ka thaiñ ha Patharkandi, kaba u la ong ba kan pynkhlain ïa ka jingwad bniah ha ka rep ka riang bad kan kyntiew ïa ki kam rep hapdeng ki samla trai ri.
Shuh shuh u Modi u la pynpaw ba ka sorkar ka pynleit jingmut ban wanrah ki kam pynroi ha khappud, da kaba ong ba ïa ki shnong kiba don ha ki khappud ne (international border) la ñiew kum ki “shnong ba nyngkong eh jong ka ri” ym kum ki shnong ba khatduh.U la kdew ba ka Vibrant Village Prokram, kaba la pynïar na ka distrik Cachar, ka wanrah ïa ka roi ka par sha ki katto katne ki jaka khappud ha ka Barak Valley.
U Myntri Rangbahduh u la pdiang sngewbha ruh ïa ka jingleh jong ka sorkar Assam ban ai ïa ka hok long trai ki jaka sha ki longïing kiba rep slasha, da kaba batai ïa kane kum ka sienjam kaba donnam bha kaban ailad ïa ki nongtrei ban ïoh ïa ki skhim sorkar kiba ïadei bad ka ïing, ka bording bad ka um dih.
Shuh shuh u la ong ba ka Assam ka dang kiew kum ka jaka pdeng ha kaba iadei bad ka jingsumar ba kongsan, ha kaba ki jaka sumar kum ka AIIMS bad ka network jong ki hospital cancer ki pynkhlain ia ki lad jingsumar ha ka jylla.
Haba pynpaw ïa ka bynta ba nangroi jong ka jylla ha ki technology ki ba dang mih, u Modi u la ong ba ka Assam ruh ka kylla long shi bynta jong ka semiconductor ecosystem jong ka India, kaba ai ki lad ki lynti kiba thymmai na ka bynta ki samla.
“Ka sngi kam jngai shuh ba yn ithuh ia ka Barak Valley kum ka jaka pdeng ba thymmai jong ka roi ka par”, la ong u Myntri Rangbahduh ka ri.
