Boko, Naitung 10: Ka jingjyllei ki kam beain, naduh ki kam tih shyiap, ki kam khaii tuh bad kumjuh ruh ka jingpom pathar ia ki dieng ban pynmih rnga, ki iaid laitlan khlem ki nongpeit kiba hap hapoh u pud u sam jong ka West Kamrup Forest Division ha Kamrup district. Kane ka division kadei ka bynta jong ka Western Assam Wildlife Division.
Wat lada ka don ka jingiada da ka ain, hynrei ka jingtih shyiap beain ka dang iai bteng beit bad man la ka sngi kumba 50 haduh 70 tylli ki trok ki kit ia u shyiap na ka wah Kulsi (Khri) ban poi sha ki jaka bapher bapher kynthup ruh sha Guwahati.
Kane ka jingbteng ka kam tih shyiap kala jia, wat hadien ba ka sorkar jylla kala pynlong ia ka jingialang ban pynkut jong ka Van Mahotsav (Forest Festival) ha rud jong kane ka wah.
U Forest Minister u Chandra Mohan Patowary bad u PCCF Sandeep Kumar kila wan ban ia don lang ha kane ka jingialang ha ka sngi Nyngkong. Kaba sngew lyngngoh ka long ba ha ka sngi kaba bud pat ka kam tih syiap kala sdang biang na ka thain Kulsi Reserve Forest.
Katkum ka survey ba la leh ha u snem 2024 da ka Wildlife Institute of India, la lum
jingkhein ba hapoh ka wah Kulsi kaba heh haduh 61 km bad la mang ban don tang hapoh 20 (range: 19–21) tylli ki dolphins. Ka Kulsi, kadei ka wah jong ka Brahmaputra, kaba don ia kawei na ki jait kha dokphin ba rit jong ka Assam. Hynrei katkum ki nongpeit bniah kila iathuh ba ka jingdon jong ki dolphin, kala hiar namar ka jingshah pynjot iki jaka shong bad ki jaka sah, kaba la shah ktah eh na ka jingtih tih shyiap.
Ki kam be-aiñ bapher bapher ki ktah jur ïa ka mariang bad ruh ia ki jaka shong jaka sah kaba la pynshong synjor ia ki dohkha ha ka wah Ganges bad kiba la jan duh jait kum ki Hati khlaw, ki khniang Muga, ki kper soh niamtra, bad ki nongshong shnong.
Hapoh jong ka Indian Forest Act, 1927 bad ka Forest (Conservation) Act, 1980, ia ki jaka khlaw (forest land) yn ym lah ban pyndonkam na ka bynta ki kam khlaw ba kynthup ia ka mining, kaba khlem pat ioh ka jingmynjur na ka sorkar kmie. Shuh shuh ka Supreme Court jong ka ri India kala pynmih ia ka jingbthah ban khang ia ka mining ha ki jaka khlaw ba la buh kyrpang na ka bynta ban iada ia ki mrad khlaw bad kumjuh ruh ban iada na ka jingshah pynjot ka mariang.
Hynrei kumba long mynta, ka jingleh baein ban leh mining ka dang iai bteng wat hapoh ka 1 haduh 5 kilometer na ka Kulsi Forest Range office bad tang 13 kilometres na West Kamrup Forest Division headquarters. Da kane ka jingbym lah ban teh lakam da ka tnad forest kala pynlong ia ki doh wah ne ki dohkha ia kaba la tip da ka shnong kum ki Xihu kiba don hapdeng ka jingma ba khraw.
Ka wah Kulsi ka iaid lyngba ki katto katne ki khlaw ba kongsan kiba kynthup ia ka Loharghat Range, Kulsi Range, Bamunigaon Range, bad ka Nagarbera Riverine Range, wat lada katne ki range ne ki forest beat offices bad ruh ka Forest Protection Range kaba don ha Bamunigaon, phewse ka jingtrei kam ka dang tlod bad ki kam beain ha kaba iadei bad ka tih shyiap ka dang iai bteng.
Ha kajuh ka por, ka jingpom pathar ia ki khlaw ka la pynkylla ia ka mariang ha kylleng ka Division bad da ka jingrit jong ki khlaw, ki hati khlaw ki la nang rung sha ki jaka shong jaka sah jong ki briew ban wad jingbam, ki pynjulor ia ki lyngkha kba, ki kait sohphan bad wat ia ki iing ki sem jong ki briew ruh kumjuh.
Ka jingpom pathar ia ki khlaw ka la ktah ia ki kper soh niamtra ha ka thain, kaba la pynlong ban hiar bha ka jingpynmih ia u soh niamtra. Ha kajuh ka por, ka jingkylla ka suinbneng, kaba lah ban don jingiadei bad ka jingpynthut ia ki jaka shong jaka sah, ka la pynduna ia ka jingmih jong ka silk Muga.
