Guwahati, Naiwieng 2: Ki pulit jong ka Cachar kum shi bynta ban ialeh pyrshah bad ruh ban pynduh jait ia ki Doctor jakoid ne (fake doctors), kila iai bteng ban pynlong ka jingkhynra ha Cachar District ka jylla Assam bad ioh ban kem ar ngut hapoh ar sngi jong ka jingkhynra.
Kine ki ar ngut ki doctor jakoid kiba la shah kem la tip kyrteng kum u Supal Roy (42), uba shong basah ha Chotojalenga part II kaba hap hapoh ka Dwarbond police station bad u Indrajit Roy (39), uba dei u nong shnong shnong ka Tatpara Jalpaiguri West Bengal.
Hab bud ryntih katkum ka jingtip ba la ioh pdiang, ki pulit ka Cachar ki la pynlong ia ka jingkhynra bad kem ia utei u doktor jakoid katba u dang sumar ne peit briew kum u doktor ha pharmacy jong u kaba don ha Rosekandy tea astate kaba hap hapoh jong ka Dwarbond Police Station.
“Ngi la kem na ka kamra jong u ha kaba u ju sumar briew man ka por.Ngi la kurup ia ki kot ki sla bad katto katne ki slip dawai kiba u ju ai sha ki nongpang jong u,” la ong uwei u heh pulit.
Ha kawei pat ka jingkhynra, sa u wei u doctor jakoid la ioh ban kem na Maa Ayurved kaba don ha E&D colony ha Tarapur. U dang leit ban jngoh kum u doctor ia ka Maa Ayurved. U Indrajit Roy u dang leit ban jngoh bad u ju ai ruh ia ki slip dawai.
“U Indrajit Roy um shym la don ano kano ka syrnod, hynrei u ju ai slip dawai ia ki briew.Ngi la kem bad leh katkum ka ain ia kaba ngi la sdang,” la ong u heh ophisar pulit.
Haba kren sha ki lad pathai khubor, u Additional SP (crime) jong ka Cachar u Subrata Sen u la ong, “Ha kine ki ar bnai ba la dep, ka jingkhynra jong ngi pyrshah ia ki doktor jakoid ka la iaid shakhmat bad haduh kine ki sngi ngi la ioh ban kem haduh 17 ngut ki doktor jakoid na ki jaka bapher bapher jong ka Cachar. Hapoh ar sngi, ngi la ioh kem ia arngut ki doktor jakoid kiba treikam ha ki jaka bapher bapher jong ka Cachar district.”
“Ngi la buh ia u number ba kyrpang 6026903329 na ka bynta ki paidbah ka Cachar bad lada ki don kano kano ka jingtip ha kaba iadei bad ki doktor jakoid, ki lah ban phone ha une u number bad ban iasam lem ia ki jingtip jong ki ha kaba iadei bad ki doktor jakoid,” la ong u Sen.
Shuh shuh u la bynrap, “Ngi don ki jingtip ha kaba ïadei bad ki doktor jakoid ha Cachar bad ka jingkhynra ka jong ngi pyrshah ïa ki doktor jakoid kan dang ïai bteng,”
