Guwahati, Nailur 7: Ka nongbah Guwahati jong ka jylla Assam kan ioh ban pynlong ia ka jingialehkai ban plie ia ka ICC Women’s 50-over World Cup ha ka 30 tarik mynta u bnai Nailur ha ACA Stadium, Barsapara, bad ia kane la pyntikna da u Secretary ka BCCI u Debajit Lon Saikia ha ka sngi u Blei.
Haba pynbna ïa kane, u Saikia u la ong ba ka India ka dei kawei na ki ri ban pynlong ïa kane ka lympung ïalehkai, ha kaba ki jingïalehkai kin long ha ki saw tylli ki jaka ha India bad kawei ha Sri Lanka.
“Ka por ïalehkai bad ka tie draw ka la dep ban pynmih. Kum ka nongpynïaid, ka BCCI kam shym la kynrandien ïa u mawsiang ban pynthikna ba ka lympung kan long ha ka rukom kaba bha tam.Ki jaka pynlong jong ngi ki la pynkhreh pura,” u la ong.
Ka jingïalang plie ïa kane ka lympung ha Guwahati, yn don ki nongrwai kum ka Shreya Ghoshal, ka ban sa pyni live bad rwai ïa ka jingrwai jong kane ka lympung.
“Shwa bad ha ka por ba sdang ka jingïalehkai, kin don ki jingïalehkai kiba ïahap bad ka jingïalehkai plie. Ka dur kaba khatduh kan sa paw shai hadien lai ne saw sngi namar ba ka jingthmu ka dang don ha ka kyrdan kaba khatduh.Ka ICC ka dang ia trei lang ban pyntikna ba kan long kaba jop, namar ba kadei ka sien ba nyngkong ha Guwahati bad ha ka thain North East kan ioh ban pynlong ia ka ICC World Cup,” ong u Saikia.
Halor ka jingïashim bynta jong ka India ha kane ka lympung, u Saikia u la pynshai ba ka BCCI ka bud ryntih ïa ka polisi jong ka Sorkar Pdeng.U la ong ba watla kam don kano kano ka jingkhang ïa ki kynhun jong ka India kiba ïakhun ha ki lympung ïalehkai ka pyrthei ne continental kum ka Olympic, ka FIFA World Cup, ka Asian Games, lane ka Asia Cup, hynrei ka don ka jingkhang ïa ki kynhun ïalehkai cricket bad ki katto katne ki ri jong ka pyrthei.
“Lada ka dei ka jingïalehkai kaba long ba pyrshah,ngin ym ïalehkai bad kita ki ri.Namar ba ka polisi jong ka Sorkar ka la kdew shai bha,” la pynksan u Saikia.
