Guwahati, Rymphang 13 : Ki Pulit kila ioh ban pyllait ia iwei I Khunlung, iba shah rahbor hynnin ka janmiet sngi U Blei na Khanapara Flyover.
Ine I Khunlung kynthei ba dang shisnem shiteng ila shah rahbor ha ki lai ngut ki runar kiba la shah kem noh ha ki Pulit tang hadien hynriew kynta.
U Police Commissioner Diganta Borah ula pyntip ba ki Kmie Kpa jong ine I Khunlung kila pyntip ia kane ka jingjia sha ki Pulit kiba la tohkit mar mar bad iohkem noh ia kine ki laingut kiba donkti.
“Kine ki Kmie Kpa ki dei kiba buh ia ka dukan kwai harus surok ha Khanapara. Uwei u briew uba ju leit bha sha dukan bad ju ialehkai bha bad ine i khunlung nalor ka jingpynthied chocolate, ula ialam ia ine I khunlung ban pynthied chocolate sha ki dukan ba marjan hynrei phewse ula jah rngai syndon, kaba lam sha ka jingsuba sniew”.
U iathuh ba da ka jingai jingtip ki Kmie Kpa, ki Pulit kila pynlong ia ka jngtohkit kaba jur bad kila ioh kem ia lai ngut kynthup ia kawei ka briew na Fatasil Ambari, Guwahati.
“Ngi la ioh ban pyllait ia ine I Khunlung tang hapoh ka hynriew kynta” ong u Borah.
Ia kane ka kam rahbur la suhbuit da kane ka briew kaba sah ha Fatasil Ambari. La iathuh ba ia ine I Khunlung la rahbor da uwei u nongdih droks Niki Boro bad aiti pat sha uwei pat u runar ba kyrteng u Samir Dey, uba la ialam sha kane ka IIng ha Fatasil Ambari.
U Borah u pyntip ba kine ki briew ki don jingthmu ban die ia ine I Khunlung ha ka dor ba T. 1,20,000.
Ki Pulit kila register case pyrshah ia kine ki laingut ha Guwahati.
