Guwahati, Jylliew 12 : Haduh 27 tylli ki syrnod sngi kha ne ki birth certificate thok la ioh ban kurup ha Hailakandi district ka jylla Assam ha ka por ba leit ban pynshisha ia u Aadhaar, kaba pyni ia ka jingjur ki kam shna thok ia ki kot ki sla hapoh kane ka thain.
“Ia kane ka jinglehthok ia ki kot ki sla la lap katba ki dang pynshisha ia ki kot ki sla ha ka por ba pynrung kyrteng ia lade na ka bynta u Aadhaar. Ha ka por ba pynshisha ia ki kot ki sla, la shem ba ki don haduh 27 ngut kiba pyndonkam da ka syrnod sngi kha ba thok” la ong u wei u ophisar.
Shuh shuh u ophisar u la ong, “Mar mar ngi la phah ia ki sha ophis u Director of Health Services ban pynshisha, bad la pyntika ba kidei shisha kiba shu thok.”
Napdeng kine ki 27 tylli ki syrnod sngi kha thok, kawei dei ba la ai da ka SK Roy Civil Hospital na Hailakandi, katba ki 26 tylli kiba sah la don ia ka kyrteng jong ka Lala Hospital.
Ha ka por ba pynlong ia ka jingtohkit, baroh ar tylli ki hospital kila kyntait ia ka jingai ia kine ki syrnod bad kane kala pynsuba ia ki bor pyniaid ba ia kine ki kot ki sla la shu leh thok.
“Kine ki syrnod kidei kiba ialam bakla kiba la don lang ryngkat bad ki QR codes bad kiba ia syriem thok bad ki kot ne ki syrnod kiba shisha. Ki don ruh kiba pyniasoh da kaba pynbud tyngneng (copy) na ka website jong ka sorkar kmie bad kane kalah ban ialam bakla ia ki ophisar ha ka por ba ki leit ban leh ia ka jingjurip,” la iathuh u ophisar.
