Kaliabor, Lber 04 :Uwei u hati khlaw uba don hapdeng ka jingkhih bitar hynnin ka sngi 3 tarik u la thombor ia ki nongtrei kper slasha hapoh Nagaon district ka Assam kaba la wanrah ka jingiap ia uwei bad ka jingmynsaw ia kumba sawngut kiwei pat.
Kane ka jingjia ka la jia hapoh kawei ka kper slasha ha Kaliabor Hatigaon jong ka district.Katkum ki tyllong khubor la ong ba kine ki nongtrei kper slasha ki dang shongthait hadien ka jingtrei kaba baroh shi sngi hadien ba utei u hati u la wan mih kynsan kynsan bad thombor ia ki.
U Laxman Minj uwei na ki nongtrei kper slasha u la khlad noh hadien ka jingmynsaw kaba jur, katba sawngut kiwei pat ki la ngat ha ki jingmynsaw.
Napdeng kitei kiba la ngat ha ka jingmynsaw bad ia kiba la pynkit noh shapoh hospital ki dei kiba la tip kyrteng kum u Prakash Ekka, Pratap Ekka, Dhiraj Tirki bad u Shani Kerketa.Khyndiat por hadien jong katei ka jingjia na ka liang ki heh na ka tnat forest ki la wan poi ha kane ka jaka ban bishar bniah ia ka jinglong jingman.
Ki tyllong khubor ki la ong ruh ba kane ka jingjia ka la wan jia lehse hadien ba utei u hati khlaw u la wan rung sha kane ka jaka na ka bynta ban wad bam.
Ka jingiatyngkhuh hapdeng ki briew bad ki mrad ki dei ki jingjia kiba ju wan jia khah khah ha ki bynta bapher bapher jong ka Assa.Uwei u briew dang shen u la shah pyniap hadien ba uwei u hati khlaw u la kyrdem ia u hapoh kawei ka karkhana kynphad ha ka shnong Balipra kaba hapoh Chariduar, Sonitpur district ka Assam.Kane ka jingjia ka la wan jia hadien ba une u briew u dang leit ban bsa kait ia une u hati.
