Guwahati, Jylliew 2: Ka jingshlei um kaba shyrkhei bad ka jingtwa jong ki khyndew na ka daw jong u lap bah ha kine ki saw sngi ba la leit kala wanrah ia ka jingiap briew kaba la kot haduh 34 ngut ki briew bad da ki lak ngut kiba la shah ktah ha kane ka jingjia ha kylleng ki jylla ka Northeast India.
Ha kine ki saw ngi kiba la leit nalor ka jingiap briew bad kila don da ki lak ngut kiba la shah ktah ha kane ka jingther u lap bah bad da ki hajar kila hap ban kynriah iing noh na ka jylla Assam, Manipur, Tripura, Sikkim, Arunachal Pradesh bad ha Meghalaya, kumjuh ruh ki bor ba dei khmih ki dang pynkhlain shuh shuh ia ka jingwad ban ioh pyllait ia kiba sahkut bad kiba jah wat lada ka jinglong ka mariang kam ailad.
Ka jinglong jingman na ka daw jong ka jingshlei um ha Assam ka dang iai neh beit kumjuh bad ka jingiap briew kala kiew haduh 10 ngut, ba kynthup ia ar ngut kiba dang shu tip thymmai na Cachar bad Sribhumi districts. Katkum ka Assam State Disaster Management Authority (ASDMA), 764 tylli ki shnong ha kylleng ki 19 tylli ki district ki shah rong ha ka um, kaba ktah ia palat 3.64 lak ngut ki briew.
Ka Cachar kadei kawei na ki district kaba la shah ktah bha na kane ka jingshlei um ha kaba palat 1.03 lak ngut ki paidbah nong shong shnong kila shah ktah ha
Silchar, Katigorah, Udharbond, Lakhipur bad ha Sonai. Tang ha Sribhumi, ki don haduh 83,621 ngut ki briew na ki 148 tylli ki shnong ki dang ia ksaid ban lait na ka jingshlei um, katba ha Nagaon ki don 62,770 ngut ki briew kiba la ktah na ki 93 tylli ki shnong.
Ki katto katne tylli ki wah kiba kynthup ia ka Brahmaputra (ha Dibrugarh bad Neematighat), Dhansiri, Kopili, Katakhal, Barak, bad ha Kushiyara, kila tuid bad jan poi ha ka jaka kaba buh ha ka jingma.
U Myntri Rangbah ka jylla Assam u Himanta Biswa Sarma u la maham ba ka jinglong jingman ka dang i shyrkhei tang na ka daw jong ka jingslap jur na ki bynta lum jong ka Arunachal Pradesh bad kaba tuid sha Silchar (42 cm), Karimganj (35 cm), ha Hailakandi (30 cm), kumta u la kyntu ia ki paidbah kiba don ha ki jaka ba i don jingma ba kin long husiar bha bad ban bud ryntih ia ka jingbthah jong ki bor ba dei khmih.
Palat 10 ngut ki briew kila leit ban sah ha ki relief camps ne ki jaka rieh tngen ba shipor ha kylleng ki jaka jong ka jylla bad kila don haduh 417 ngut kiba la ioh ban pyllait im lyngba ki lieng bad 14 ngut la pynkit noh da ka helicopter.
Ha kawei ka jingiarap ba khraw kawei ka Mi-17 helicopter jong ka Indian Air Force kila ioh ban pyllait im 14 ngut ki briew kiba la sahkut ha kawei ka dew lynnong ha ka wah Bomjir River ha Lower Dibang Valley, Arunachal Pradesh. Ha ka jingiatrei lang bad ki bor pyniaid ban iarap napoh ka jylla Assam bad Arunachal la lah ban wanrah ne pynpoi sha ki jaka ba long shngain.
Ha North Sikkim, kumba 1,200 ki tourist kila sah kut tang namar ka jingtwa jong ka khyndew kaba la rah lang ruh ia ka surok bad ki bor ba dei khmih ki dang ialeh ban shna bad ban ioh pyllait ia kito baroh ki jaka ba twa hapoh ka jylla.
Ha Tripura, ka jingshlei um, ka la ktah ïa palat 10,000 ngut ki briew, katba ka Jylla Meghalaya, ka mad ïa ka jingjulor kaba jur ha kylleng ki 10 tylli ki district, na ka jingshlei um bad ka jingtwa khyndew.
U Union Home Minister u Amit Shah u la ong ba ka sorkar ka dang buddien bha bad peitngor bad kumjuh ruh ka ia trei lang ryngkat bad ki sorkar jylla ha kaba iadei bad kane ka jingshlei um.
Shuh shuh u Amit shah haba ha ka X u la ong, “La dep ban ia kren bad ki myntri rangbah jong ka jylla Assam, Sikkim, bad Arunachal Pradesh bad ruh kumjuh ia u Lat ka jylla Manipur ha kaba iadei bad kane ka jingbteng jong u slap ba jur….Ka sorkar ba ialam da u Narendra Modi ka ieng skhem kum u maw siang ban kyrshan ia ki paidbah ong ka Northeast”.
Na ka liang jong ka myntri sorkar Assam ka Jayanta Mallabaruah kala pynbna ban ai jingiarap ba 4 lak tyngka sha kito kiba la khlad noh na ka jingshlei um.
Ka kynhun jong ka Civil Defence, NDRF, SDRF, Fire & Emergency Services, bad ki bor ba dei peit napoh ka jylla ki dang ia trei shitom baroh 24 kynta. Ha
Nagaon bad ha kiwei de ki district, kila pynmih ia ka jingbthah paidbah ba kidei ban long kiba husiar bad kiar ban leit sha ki bynta ba shlei um bad kumjuh ruh sha ki wah.
