Guwahati, Nohprah 23: Arngut ki briew ki la iap bad 48 ngut ki pulit ki la mynsaw, kynthup ia 2 ngut ki IPS Officer namar ka jingjia umsnam kaba ka nang jur ha Karbi Anglong ha ka 23 tarik Nohprah.
U Director General of Police ka Jylla Assam u Harmeet Singh u dei uwei naki Pulit ba mynsaw hadien ba ki paidbhur ki la hiar thma ia ki bor pahara ha ka thain Kheroni jong ka West Karbi Anglong.
Haba kyntu ban kiar ha ka ban pynmih ia ka jingkulmar, u DGP u la kyntu ia ki nongiakhih ba kin kiar na ki jingshim iaka ain ha kti haba ban ba ki dei ban iatreilang bad ki bor synshar.
U la ong ba ki bor pahara ki la shah thombor na baroh arliang watla la pyrshang bunsien ban iakren , kaba la pynbor ia ki pulit ban jubab kylla.
“Ki la thombor ia ki Pulit da ki maw, ki ryntieh bad kiwei kiwei ki tiar ialeh ba la shna hi. Ki don ki pulit kiba la mynsaw jur” u la ong.
U la bynrap ruh ba la pynbun shuh shuh ki bor ha ki jaka ba lah ban mih jingkulmar ban ïada bad ban pynneh ïa ka shongsuk shongsaiñ.
U DGP u la maham ba ia kiba donkti ban thang ia ki dukan bad kiwei kiwei ki kam bymman yn sa ithuh bad yn katkum ka ain.
U la ong ba ki pulit ki la pyndonkam da ki bom pynsat khmat bad kiwei kiwei de ban pynpra ia ki paidbhur.
Ha kajuh ka por, 8 kynhun ki battalion ha ryngkat bad ki 5 kynhun Central Reserve Police Force kila don ha West Karbi Anglong haki jaka ba shah ktah bha ha ki kam thombor.
La khang ruh iaka mobile internet ha kylleng ki district jong ka Karbi Anglong bad West Karbi Anglong ha ryngkat ka jingpynjari iaka Curfew katba ki bor synshar ki dang ïai trei ban wanrah biang ïa ka jingshongsuk shongsaiñ.
