Tinsukia, Nailar 11: Saw ngut ki briew kynthup ia shikpa shikhun kila iap ha ka tanky buh kyaid ha Tipuk kaba hap hapoh ka Doomdooma Police Station, ha Tinsukia District ha ka sngi Palei.
Kine kiba iap ki kyrteng u Ram Prasad Rai ba 70 snem, u Khun Patarji Rai ba 40 snem bad arngut ki nongbylla ba kyrteng u Jagdish Gowala ba khot sin u Koya ba 40 snem bad u Pukla Kishan ba 38 snem.
Kat kum ka khubor, kine ki briew ki dang pynkhuid ia ka lali gur kaba dei ban bret khnang ban pynkhreh ia ka chulai. Kine ki briew kila rung shapoh kane ka top ha ka por ba dang slap.
Phewse katba ki dang pynkhuid ia ka top, u slap ula sangeh noh bad ka suinbneng ruh kala shit kyrang haduh ba kine ki briew kila iap-op bad khlad noh na ka jingbym lait ring mynsiem bha.
La pynkit noh ia kine ki briew ha Doomdooma FRU Hospital ha kaba ki doktor kila pynbna ba kila iap. Ki Pulit kila register case halor kane ka jingjia bad ka jingtohkit mynta kala iaid shakhmat.
Ki Pulit ki iathuh ba u Ram Prasad Rai u dei uba bna nam bha ha ka thain kum u mafia shna chulai bad ula pyniaid iew ia ka kyaid pyrsi da ki phew phew snem. Watla ka Tnad Excise kala tip bha shaphang jong u, hynrei kim shym la leh eiei ia kane ka kam lait noh tang ka jingleit khynra ba katto katne sien.
