Guwahati, Jylliew 24: Namar jingiakynad hapoh ka Jribam District, Manipur, ki bor pyniaid District jong ka Cachar, Assam bad Jribam District, Manipur kila pynlong ia ka jingiakynduh lang hynne ka sngi ha Jirighat Police Station kaba don ha Cachar ban iamit jingmut kumno ban lah wanrah pat ka jingsuk ha ka thain.
Ha katei ka jingialang la iadonlang u District Commissioner ka Cachar u Rohan Kumar Jha, u Superintendent of Police u Numal Mahatta, u Additional DC ka Jiribam u Manoranjan Tokcham bad u Additional SP u Thomas Tokcham.
Haba iakren bad ki nongthoh khubor, u Rohan Kumar Jha ula ong, “Mynta ka sngi ngi la iakynduh bad ki bor khmih jong ka Jiribam District bad ngi lah iakren ba dei ban pynneh pynsah ia ka jingsuk ha kane ka jaka. Ka jinglong jingman hapoh Jiribam kala sdang ban bha bad ngi lah iakren ruh ban shim ia ki lad ki lynti ban pynduna iaka jingiakynad. Ngi la ioh ia ka jingbthah ban leit jurip ia man la ki iing ha ki thaiñ khappud bad kumta ngi lah kyrpad ia ki ba kin iarap ia ngi bad ban iatreilang bad ngi. Kito kiba la wan sha Cachar ban shong ban sah hadien jong ka jingiakynad, ngi lah kyrpad ia ki ba kin leit phai noh sha ki iingsah ki jongki bad ngi lah pynthikna ba ngin ai ka jingiada kaba pura ia ki”.
“Kum ka jingshim ia ki lad ban pynduna ia ka jingiakynad, ngi lah kren ia ki DC bad SP ka Jiribam. Kitio kiba wan sha Cachar hadien ka jingiaumsnam, ngi lah ai jingiada kaba pura ia ki. Haba ka jinglong jingman ha Jiribam kala nang bha, ngi kyrmen skhem ba ki paidbah ki lah ban leit phai noh sha ki iing ki sem ki jongki. Ngi ngin ai iaka jingiada bad ka jingpahara kaba pura na ka bynta ban leit phai kitei ki briew” ong u Numal Mahatta.
Katba u Manoranjan Tokcham ula ong,” Ka jinglong jingman ka lah biang hi, hynrei ka lah ba kan nang bha shuh shuh namar ba ngi lah shim ia baroh ki lad bad ki sienjam”.
“Ngi kwah ban ai khublei ia ki pulit Assam bad ia ki paidbah ka Assam kiba la ai ka jingiatreilang bad ngi mynta la shi snem. Ngi dang iakren khah khah bad ki heh ki haiñ ka Assam hadien ka jingsdang ka jingiakynad ha Jiribam ha ka 6 tarik u Jylliew. Ka bynta jong ka Cachar kala long kaba shongsuk shongsain bad kam shym la don satia kano kano ka jingjia ha kateika thaiñ bad ngi ngeit skhem ba kan ym don kano kano ka jingjia haka bynta jong kane ka khappud” ong u Thomas Tokcham.
Kumba 900 ngut ki riewlum Kuki bad Hmar kila leit sah ha ki iing ki sem jong ki bahaiing bahasem bad ki paralok parajor ki jongki kiba don ha ka shnong Haokippunji bad Hmarkhawlienin kiba don ha Cachar District jong ka Assam hadien ba kala mih ka jingiaumsnam.
Ka wah Barak bad Jiri kala pyniakhlad ia u pud hapdeng ka Manipur bad Assam. Ka Jiribam ka jngai kumba 45 Km na Silchar, Cachar bad 222 Km na kanongbah Imphal jongka Manipur.
Ka Jiribam district kadei kaba la mih na ka Imphal East district ha u 2016 bad ki jaidbynriew Meitei kidei kiba bun tam ha kane ka district bad ha ka Jiribam.
