Assam | Iakhih ki samla pule Bodo | Dawa pyntreikam pura ia ka Peace Accord 2020

Boko, Risaw 29: Ka surok ha Dudhnoi jong ka Goalpara district, Assam, kala shlei da ki samla pule ha ka sngi Balang namar ka jingiakhih jong All Bodo Students Union (ABSU), ha ryngkat bad kiwei ki khynhun jong ki Bodo, ban dawa pyntrei kam noh mardor ia ka Bodo Peace Accord kaba la iasoi ha ka 27 tarik u bnai Kyllalyngkot ha u snem 2020.

Ki nongïakhih ki la kyntu ïa ka sorkar ban pynkynriah ne transfer noh ïa ki 312 tylli ki shnong kiba bun paid ki Bodo kiba hap hapoh ka Goalpara bad South Kamrup district—kiba mynta ki hap hapoh ka Rabha Hasong Autonomous Council—sha ka Bodo Kachari Welfare Autonomous Council (BKWAC) kumba la tyrwa. Ki la pynbor ruh ban pynlong ia ka elekshon kloi sha jong ka council.

Ha ka jingkyrpad kaba jur sha ki bor synshar ka jylla, ka kynhun jong ki samla pule ki la dawa ban thung kloi ïa ki nonghikai kiba hikai ha ka ktien Bodo ban pyndap ïa ki kam kiba lait ha ki skul kiba hikai ha ka ktien Bodo.

Shuh shuh kila khot ban pynlong provincialisation noh ia kine ki skul bad ban pyndep kloi katba lah, ban pynthikna ia ka jinglong jingman kaba kham bha ha ka pule puthi na ka bynta ka imlang sahlang.

Kine ki nongiakhih kila maham tyngeh ruh ba lada ym lah ban pynurlong ia kine ki jingdawa ba la slem jong ka jaitbynriew Bodo kin ai ïa ka jubab kaba kaba biang ha ka election 2026 ka ban wan.

Ha kajuh ka por, ka Bodo Students Union ha Boko ruh ki la mih paidbah da ka jingiaid paidbah ban pyrshah bad ai ruh ia ka jingthoh jingkynmaw kaba la thoh sha u Myntri Rangbah ka Jylla u Himanta Biswa Sarma lyngba u Additional Co-District Officer ka Boko – u Chaygaon u Raben Deuri.

Ki nongiakhih ki la pynpaw ruh ba ki jingkular ba la khlei ha ka peace accord ha u snem 2020 kim dei ban shu sah tang ha ka kot bad ki la kyntu ia u Myntri Rangbah ka Jylla ban shim ia ki sienjam kiba skhem ban pynurlong ia ki jingkular ba la ai sha ka jaitbynriew Bodo.