Guwahati, K’lyngkot 07 : Ki shipai Indian Army bad ki Navy nalor ka NDRF bad SDRF, kila pyrshang katba lah ban wad ia ki nongtih dewiong kiba shah tap ha ka jingtwa jong ka par dewiong ha Umrongso kaba hap hapoh ka Dima Hasao District.
Palat 10 ngut ki nongtih par ki dang sahkut shapoh ka par kaba la shlei um naduh ka step sngi Nyngkong.
Ki nongngam um jong ki shipai Indian Army ha ryngkat ki Engineers Task Force bad ki Doktor, kila ialam ia kane ka jingwad briew. Ki nongngam um jong ki Navy na ka Eastern Naval Command ha Visakhapatnam kila don ha lynti ban leit ai jingiarap lang namar ka jingioh khubor ba ka um kala nang kiew sha ka 100 phut ha kane ka par.
Ka khubor ka iathuh ba 27 ngut ki nongtih par kila sahkut shapoh kane ka krem bad napdeng kine, 10 ngut kila ioh ban mih shabar. Hapdeng 13 haduh 17 ngut ki nongtih par ki dei kiba dang sahkut shapoh ka krem. La iathuh ruh ba lai tylli ki metiap kila per ha sla um hynrei ia kine ki met ym pat lah satia ban sei namar ka jingnang kiew jong ka um bad kiwei kiwei ki jingeh.
Kine ki nongtih par ba sahkut shapoh ka krem, kiba don hapdeng 26-57 snem, ki kynthup ia kiba na Assam, West Bengal bad na Nepal.
U Myntri Rangbah ka Assam Himanta Biswa Sarma ula pynthikna ba ki nongngam um jong ki Navy kila wan poi sha kane ka jaka ban iarap lem.
