Guwahati, Nailur 16: Ha ka sien kaba nyngkong ha ka jyrsieh khaii Online pyrshah ia u Bishal Phukan bad kiwei kiwei, ki Pulit kila ioh ban pdiang haduh 4 tylli ki ejahar ha Dibrugarh Police station ha ka sngi Nyngkong.
Haduh 4 ngut ki lanot kila ujor mar kawei ka ejahar da kaba kynnoh ba u Bishal Phukan u la bam da ki lak tyngka ka pisa jong ki..
Haki ejahar la pynrung ruh ïa ki kyrteng jong ki 2 ngut kata u Abhijit Chandra bad u Manbendra Singh.
Lah ban kdew ba kham mynshwa ki pulit ki la kem ia u Bishal Phukan hadien ba ki la Register Case Suo-Motu pyrshah ia ka kam khaii online.
Haduh mynta, ki jaka kiba shongdor palat ia ka T.5 klur la kurup da ki pulit haba iadei bad kane ka kam.
Ka jingset phatok ia ka actress Sumi Borah, u Tarkik, bad u Amlan Bora, kan kut noh ha ka 17 tarik mynta u bnai.
La iathuh ba ym pat don ki doktor kiba la shah khot ne shah tohkit ha ki pulit ha kaba iadei bad katei ka kam haduh kine ki sngi.
La iathuh ba ka Sumi Borah, u lok jong ka u Tarkik Borah, bad u hynmen jong ka u Amlan Borah, ki la shah sumar ha Assam Medical College ha ka por kumba 1:20 baje mynstep hadien ba la iathuh ba ki la kem pang. Ki la ioh jingsumar haka por miet, ha kaba ki doktor ki la ai ia ka jingsumar ia ka jingpang ba ki don.
La iathuh ba baroh 3 ngut ki don hapdeng ka met ka bym khlain haka por ba ki shah kem bad hadien ka jingpeit bniah ia ka kaiphod ki doktor bad ki test bapher bapher, la wanrah biang ia ki sha ka jingpeit jong ki pulit ha ka por shiteng miet.
Ha ka taiew ba ladep, ki pulit ki la kem ia ka actress-choreographer ka Sumi Borah bad u lok jong ka uba dei u nongring dur u Tarkik Borah halor ka jingkynnoh ba ki donkti ha ka kam khaii stock online kaba la antad ba shongdor kumba T.2,200 klur.
Ka Special Task Force (STF) jong ki pulit ka la kem ia kitei ki 2 ngut ha ka lynti ban leit sha Dibrugarh ha kaba ki la thmu ban wan pyndem noh hakhmat ki pulit hadien ba ki la phet rieh kumba 10 sngi.
