Guwahati, Naiwieng 06 : Lai tylli ki seng Khristan kila iaphah lang ia kawei ka jingujor sha ki bor District ka Dima Hasao, ba dawa ban leh eiei kat kum ki kyndon ain pyrshah ia u Nongialam ka VHP Surendra Jain halor ka jingkynnoh ba ki Balang ki donkti ha ki kam khaii droks.
Kine ki Seng kim shym la batai shai ia ki jingkren u Jain hynrei kila batai ba ka jingujor ka dei kaba la mudui ban phah ia ka khubor ia ka jingsngew kyndit, jingmong bad jingsngewsih halor ki jingkynoh u Jain ba pyrshang ban pynthohbria ia ki paid Khristan.
Kane ka jingkren u Jain ka dei kaba la jia ha ka jingialang plie ia ka Joya Thaosen Computer Learning Centre ha Haflong myn ha ka 27 tarik Risaw.
U Jain ula ong “Mynta nga sngewthuh ba ka kam khaii droks ka dei kaba la leh da ki Balang ha ka lynti kaba heh bha. Ha kawei ka liang,ki Balang kila pynjot ia ka kolshor, niew bein ia ki dustur bad jingngeit hangne bad pynjot ruh ia ka jingim jong ki briew hangne”.
Ula bynrap “Ka jingpynkylla niam ka dei ka jingeh, ngi la leh eiei ia ka hynrei ngin sa ong ruh ia ki Balang ba katba ki Khristan ki dang long laitluid ban bud iala ka niam, kano kano ka jingpynthut ia ka suk ka sain, jingbym burom ia ki jingngeit kiwei,lane donkti ha ki kam khaii droks, ki dei kiba ka imlang sahlang kan ym sngap jar satia”.
Ka mudui jong kine ki seng Khristan kala pynrem ia ka jingkren u Jain bad ong ba ki dei kiba khlem nongrim bad ka bym lah satia ban pdiang haba pynksan ba kum kine ki jingkren, ki wahrah ia ka jingbym shaniah, jingpyniapait iapra bad pynjot ia ka jingialong kawei bad ia imsuk imsain jong baroh ha Assam bad ka Ri baroh kawei.
