Guwahati, Lber 7: Ka jingbym thikna ka la mih halor ka jingiateh lok hapdeng ka Congress bad ka seng riew lum Raijor Dal, ba la ialam da u Akhil Gogoi, ha shwa ka elekshon sha ka iingdorbar thawain ka Assam, ka ban long mynta u snem 2026.
U heh jong ka Raijor Dal u Akhil Gogoi u la leh live lyngba ka facebook na Kaziranga Orchid Park ban pynpaw ia ka jingbynniaw halor ka jingbym iaid shaphrang ha ka jingiakren ban iatreilang bad ka Indian National Congress.
Ha kane ka live video, u Gogoi u la kren halor ka jingsngewsih jong u halor ki jingjia ha ka sain pyrthei kiba dang ïaid shakhmat.Ha kajuh ka por, u la pynpaw ia ka jingbym thikna kaba don sawdong ka jingthaw ia ka jingiatylli ka liang pyrshah kaba kham iar pyrshah ia ka Bharatiya Janata Party (BJP) kaba synshar.
Ki tyllong khubor ki iathuh ba ka la don ka jingbym iasngewthuh jingmut hapdeng ka Congress bad u Raijor Dal halor ka jingiasam seat.
“Ka APCC, kaba ialam da u Gaurav Gogoi, kam sngew tynnad ia ka Raijor Dal namar ba ka party ka la shu iateh lok ban ioh kham bun ki seat.Ha kajuh ka por, ka Congress kam shaniah pura ia ki”, la ong ka tyllong khubor.
Katba u Akhil Gogoi u la ap ha ki thaiñ Kaziranga da ka jingkyrmen ban pynlong ïa ka jingïakren bad ki nongïalam ka Congress ha kaba ïadei bad ka jingïateh lok kaba lah ban long.Hynrei kam shym la don kum kata ka jingialang.
Haba ïakren bad ki nongthoh khubor, u Gogoi u la ong ba ka long “kaba pynjah burom” ba ka Congress ka la pynlong ïa ka jingïalang bad ki nongthoh khubor ban pynbna ïa ka jingïatreilang bad ki saw tylli ki seng katba la iehnoh ïa ka Raijor Dal.
“Ka bol mynta ka don ha kti jong ka Congress,” la ong u Gogoi da kaba pynpaw ba ka sienjam kaba bud ka dei ban wan na ki nongialam ka Congress.U la ong ruh ba un ap haduh shiteng miet na ka bynta kano kano ka jubab ha kaba ïadei bad ki jingïakren jong ka jingïatylli ban ia trei lang.
Ha ka elekshon sha ka iing dorbar thawain ba la dep, ka Raijor Dal ka la jop tang kawei ka seat, ha kaba u Akhil Gogoi u la ioh ia ka jingjop na Sivasagar constituency.Ha kane ka kynti, ka seng ka kwah ban iakhun shuh shuh ia ki seat bad ka la aiti ia ka jingtyrwa jong ka sha ki paralok ba iatreilang.Hynrei la ïathuh ba ki nongïalam ka Congress kim sngewhun ïa ka jingtreikam jong ka Raijor Dal.
Ha kine ki por ba dang shen, ka Raijor Dal ka la tei ia ka jaka kyrshan hapdeng ki rit paid ha Lower Assam, ha kaba katto katne ngut ki nongialam ba paw na ka jaidbynriew rit paid ki la pyniasoh ialade bad kane ka party.
Ka Raijor Dal, ka seng saiñ hima sima jong ka thaiñ, ka la mih hadien ka jingïakhih pyrshah CAA, ha kaba u Akhil Gogoi u la long u nongialam ba kongsan jong ka.
Kine ki jingjia ki wan shisngi hadien ba u Gaurav Gogoi u la pyni ba ka Congress ka la pyndep ïa ka jingïatreilang jong ka bad ki saw tylli ki seng pyrshah ha kane ka jylla.Hynrei um shym la pynshai satia la ka Raijor Dal ka don bynta ne em ha katei ka jingiateh lok.
