Guwahati, K’Lyngkot 7: U Myntri Rangbah ka Jylla Assam Himanta Biswa Sarma u la ong ba ka jingjur bad ka jingkiew jong ka jingshah thombor ki riewngeit Hindu ha ri Banglasdesh kadei ka mat kaba sngewkhia bha.
Haba iakren bad ki lad pathai khubor, u Sarma u la ong, “Ka long kaba sngewkhia shibun ia ngi ia kaei kaba jia ha Bangladesh. Ki jingjia jong ka jingshah thombor ia ki Hindu ka lah ban don ka jingktah ha Assam, ngin hap ban long kiba husiar bad buddien ia ka jinglong jingman,”.
U Sarma u la ong, ka jingsniew jong ka jinglong jingman ha Bangladesh bad ki sakhi jong ka jingkiew jong ki kam jihadist ha Assam ha kine ki 10 snem ba la dep ka kdew sha ka jingma ha ka liang ka jingshngaiñ lymda ka jinglong jingman ha ka thaiñ ka kham bha.
Katba ki riewngeit Hindu bad Buddhist na Bangladesh kiba wan buhai shnong ki la pynlong ia ka jingiakhih ha Republic Square ha Paris, France ban pyrshah ia ka jingshah ban bein ki Hindu ha Bangladesh.
Ki nongïashim bynta ha kane ka jingïakhih ba la pynlong lang da ka Bangladesh Hindu-Buddhist-Christian Unity Council, Paris, bad ka Bureau of Human Rights and Justice (BHRJ) ha ka Sngi U Blei, ki la dawa ban ai ka jingpyn shitom kaba long ka nuksa ïa kito kiba la pynïap briew ba ishyrkhei bha ïa u rangbah Hindu u Dipu Chandra Das halor ka jingkynnoh thok ba u kren beiñ ïa u Blei.
“Kumba 187 ngut ki Hindu ki la shah pyniap ha une u snem ba la dep, 221 ngut ki kynthei Hindu ki la shah leh beijot, katba da ki hajar tylli ki iing bad ki jaka treikam jong ki Hindu ki la shah thombor, shah pynjot, bad shah thang.Ka jingshah thombor ki Hindu halor ka jingkynnoh ba ki kren bein Blei bad ka jingshimti ia ki iing mane blei bad ki temple ka la kylla long kaba man la ka sngi kaba la jia ha Bangladesh,” ong ka BHRJ ha ka kyrwoh khubor.
Ki nongïakhih ki la dawa ïa ka hok na ka bynta ki Hindu kiba shah pynshitom beiñ bad ban pynsangeh noh ïa baroh ka jingshah pyniap pyrshah ïa ki Hindu ha Bangladesh.
