Guwahati, Lber 04 : U Myntri ka Tnad Ports, Shipping & Waterways bad Ayush, Sarbananda Sonowal, ula buh maw nongrim ia ka Ayurvedic College kaba ar ha Dudhnoi, Goalpara District ka Assam hynne ka sngi Nyngkong.
Ula buh maw nongrim ruh ban tei ia ka Ayush Hospital ba 100 jingthiah ha Mowamarirjhar, kaba don ha Kokrajhar bad ha Silbari kaba don ha Baksa, lyngba ka kor internet na Dudhnoi.
Ia kine ki College yn tei ha ka jingmang pisa ba kot T. 70 klur. Ka Ministry of Ayush kala mynjur ia ka jingtyrwa ban tei ia ka Ayurvedic College ha Dudhnoi ha u snem 2022-2023.
Lah ban kdew ha ka Ayurvedic College ba nyngkong eh ka dei kaba la tei ha u snem 1948 ha Guwahati da ka Bharat Ratna Lok Priya Goinath Bordoloi.
Haba kren ha ka jingialang, u Sonowal ula ong “Hapoh ka jingialam ba tbit jong u Myntri Rangbah Duh Narendra Modi, ka Assam kala ioh kheit ia shibun ki jingmyntoi na ki prokram bad skhim bapher bapher kiban pynkylla ia ka jingim jong ki briew ba manla ka sngi.
Ula ong, ia ka jingsumar nala tynrai jong ngi ka dei kaba la phai lyndet ha ka por jong ka Sorkar Congress, kaba lam sha ka jingnang troin, tad haduh ba shimti u Narendra Modi. U Modi ula pynkylla thymmai ia ka rukom ai dawai tynrai bad ula pynkupbor ban long ka lad ai jingsumar kaba kynsai.
Ka Ministry of Ayush kala pyllait haduh T. 131.11 klur kum ka bhah jong ka Sorkar Pdeng sha ka Assam tad haduh u senm 2023-24. Haduh 8 tylli ki Integrated Ayush Hospital la mynjur da ka Ministry ha kaba 2 tylli ki dei kiba la treikam mynta. Ka Ministry kala mynjur ruh ia 500 tylli ki Ayushman Arogya Mandir ha kaba 289 tylli kila treikam bad sa 100 tylli ki Ayush Dispensary la mynjur bad ki dang pyntrei mynta.
