Dibrugarh, Nailur 10: Ki nongtrei jong ka tnad Municipal ha eastern Assam, ha ka sor Tinsukia kila shim ia ka sienjam ba tyngeh pyrshah ia ki nongleh kam bakla ia kaba kila shu bret beit ia ki jaboh bad ki jakhlia ha khmat ki dukan jong ki.
Ki trai dukan ki dei u nongleh ialeh pyrshah da kaba bret jaboh bad jakhlia harud surok. Ha kane ka kynti ba mynta ki nongtrei jong ka Tinsukia Municipal Board ki la leh ia ka kam kaba ki ju leh man ka por.
Ha kawei na ki video kaba la saphriang bha, la iathuh ba katei ka jingjia kala jia ha ka miet jong ka sngi Nyngkong ha ka por 9.30 mynmiet ha ka thain Daily Bazar.
U wei u nongtrei ka dukan buh marbam bad ha kajuh ka por ba buh ruh ia ki tiar ai sngewbha (gift) la iohi ba u bret beit beit ia ki synduk kot ha surok.Kane ka jingleh jong u kam shym la long lehnoh ei namar ba la don kiba sakhi.Ka kynhun jong ki nongtrei ka Tinsukia Municipal Board katba ki dang leh ia la ka jong ka kamram ha ka por miet kiba la sakhi ia kane ka jingleh jong u mar mar kila leit ba ialeh pyrshah bad u tei u nongtrei ka dukan.
Haba kylli, utei u nongtrei u la ithuh ba ka dukan kaba don hajan jong u ka dei ka jaka ba la pynmih ia ki jaboh. Ha ka jaka ban shain da ka kuna kaba thikna, ki nongtrei ka municipal ki la thaw ia ka rukom kaba kham beit ban pynpoi ia ka khubor.
Ha ka step kaba bud, ha ka por kumba 8 baje mynstep ki nongtrei ka Tinsukia Municipal Board ha ryngkat bad ka kali kit niut kila khat noh ia ki niut kiba la shu bret pathar bad hadien ynda kila dep kila leit sha ka dukan ia kaba la iathuh da utei u nongtrei ka dukan marbam.
Da kaba khang ia ka dukan, ki nongtrei ki la khat kylla ia ki jaboh ba kila bret bad buh ha khmat ha ka jingkhang ban rung shapoh, da kaba pynthikna ba u trai un iohi ia la ki jong ka jaboh ba u la bret ynda u la poi.
Kiba bun ki nongshong dukan ha Tinsukia ki shu bret beit ia ki jaboh harud surok hadien ba ki la khang ia ki dukan jong ki. Ka Tinsukia Municipal Board ka la pynmih ban dain kuna bad kyrpad ia ki ba kim dei ban bret ia ki jaboh harud surok hynrei mano ban sngap? Kum kine kiei kiei ki jia man ka por ha Tinsukia.
Hynrei ha kane ka kynti ba mynta, ki nongtrei jong ka Tinsukia Municipal Board, ki la leh ia kaei kaei kaba pher pyrshah ia ki nongleh ialeh pyrshah kiba ju bteng ban leh beit kumjuh.
“Dei namar ba kum kine ki trai dukan, ka sor Tinsukia ka sa kylla jaboh namar ba kim ju bud ryntih ia ki rule. Man ka sngi ynda kila khang ia ki dukan ki shu bret beit ia ki jaboh sha surok. Nga dpiang sngewbha ia kane ka sienjam ba la shim da ka Tinsukia Municipal Board. Ki paidbah kim don satia ia ka jingmut jingpyrkhat, da kaba ki pynkylla hi da lade ia la ka jong ka sor ban pynjakhlia da kaba bret jakhlia bad jaboh hangne nangtai,” ong u Umkanta Mech, u nong shong shnong ka Tinsukia.
