Guwahati, Nohprah 29: U Myntri kam Pohiing ka Ri, Amit Shah ha ka sngi nyngkong u la kyrpad ia ki paidbah ka jylla Assam ba kin ai biang sa san snem ia ka BJP ba kan synshar ia ka Assam, bad pynpaw ba ka party ka jong u kan beh krad lut ia kiba wan buhai shnong beain ha Assam.
U Shah u la kren ïa kane haba plie ïa ka projek jong ka Batadrava Than kaba la mang tyngka ₹227 klur ha ka Nagaon district—ka jaka ba la kha ïa u Vaishnavite ha ka spah snem ba 15, u Srimanta Sankardeva—ïa kaba la pynroi kum ka jaka pdeng ba kongsan jong ka jinglong mynsiem bad ka kolshor.
U Myntri u la poi sha Borduwa da ka liengsuiñ na Guwahati bad la pdiang burom ia u da ka rukom leh tynrai kaba la pyni da ki jingshad tynrai jong ki nong Assam, ba kynthup ïa ka Gayan-Bayan bad ka Diha Naam. La iohi ia u Shah ba u iaroh ia ki jingshad.
Haba kren ha ka jingialang, u Shah u la kam ba ka jaka kha jong u Sankardeva ka la don kham mynshwa hapoh ka jingshah kyntur pud. “Hato ka la long kaba dei hok ba ka jaka kha jong kum une u riewkhuid ka la shah thombor ha ki nongwan rung be-aiñ? Mynta ka sngi, ïa kata ka jaka la pyllait bad la pynroi sha ka projek ka ban pawnam ha ka pyrthei,” u la ong bad bynrap ruh ba palat shi lak bigha ka jaka ha kylleng ka Assam la pynkhuid na ki jingshah ktah na ka jingshah kyntur pud.
Da kaba thew beit ïa ka Congress, u Shah u la kynnoh ba ki sorkar ba mynshuwa ki la ailad ïa ki nongshong shnong kiba wan rung beaiñ ban sah na ka bynta ka jingmyntoi elekshon. “Kito kiba iohi ia ki nongwan rung tuh kum ka vote bank kim ym lah satia ban shim khia bad leh da kaba tyngeh”, u la ong haba kdew ia ka ain IMDT kaba la pyndam noh mynta.
“Ai lad ia ka BJP sa san snem ha Assam, bad ngin ym weng tang ia ki nongwan buhai shnong beain na kane ka jylla hynrei na ka ri hi baroh kawei.Man kawei pa kawei ka jaka ba la shah knieh da ki yn sa kurup biang”, la pynskhem u Shah.
Haba pynpaw ia ki kam pynroi hapoh ka jingsynshar jong ka BJP, u Shah u la ong ba ka Assam ka la sakhi ia ka jingroi kaba ym pat ju jia mynno mynno ruh ha kine ki phew snem ba la dep. “Mynshwa, ka Assam ka la pawnam na ka bynta ki jingbthei bom; mynta ka sngi ka sawa da ka jingaiti lut bad ka roi ka par. Ka Assam ka la kylla long ka kor pynroi jong ka dong shatei lam mih ngi baroh kawei,” u la ong, da kaba ai burom ia ka jinglong nongialam u Myntri Rangbahduh ka ri u Narendra Modi, u myntri rangbah barim ka Assam u Sarbananda Sonowal, bad ka sorkar ba mynta ba la ialam da u Himanta Biswa Sarma.
U Shah u la pynkynmaw ruh ïa ka bynta jong u Gopinath Bordoloi, da kaba ong ba khlem ka jingpyrshang jong u, ka thaiñ Shatei Lam mih ngi ka lah ban nym neh sah ha ka ri India.
Shwa kane, u Myntri Rangbah ka Jylla u Sarma u la ong ba ka jingplie ïa ka Mahapurush Srimanta Sankardeva Abirbhav Kshetra ka dei ka dak kaba kut jong ka jingpyrshang kaba la neh saw snem ban pynïoh biang ïa ka Batadrava kum ka jaka pdeng kaba im ha ka liang ka mynsiem bad ka kolshor. “Ka mon lang jong ki paidbah ka Assam ka la thoh ia ka histori mynta ka sngi”, u la ong.
Kane ka jingkren jong u Shah ka wan hapdeng ka jingpynleit jingmut kaba jur ha ka sain pyrthei halor ki mat jong ka jingwan buhai shnong, ka hok halor ka jaka, bad ka jinglong kyrpang ha ka kolshor ha Assam shwa ki jingiakhun elekshon ban wan.
U Union Home Minister myntri un leit phai biang sha Guwahati.Ha kaba un leh ïa kiba la khlad noh na ka Assam movement pyrshah ïa ki nongwan buhai shnong be-aiñ ha ka ‘Swahid Smarak Kshetra’ ba la tei thymmai.
Un plie ruh ia ka iing thymmai jong ka Guwahati Police Commissionerate kaba shongdor T.111 klur bad ia ka integrated command and control system (ICCS) kaba shongdor T.189 klur ban pynkhlain ia ka jingshngain jong ka nongbah.Ka ICCS kan buddien palat 2,000 tylli ki kor CCTV ha Guwahati ban pynkhlain ia ka jingpahara bad ki rukom ai jingiarap kyrkieh ha ka jylla, la ong u Sarma.
U Shah un plie ruh ia ka Jyoti Bishnu Cultural Complex kaba shongdor haduh 291 klur tyngka, kaba dei ka Auditorium kaba lah ban ngiam haduh 5000 ngut ha Guwahati.
