Shillong, Mar 24: Ka kynhun ialehkai ka ri India kala sdang ia ka jingiakhun kaba nyngkong jong ka AFC Asian Cup 2027 Qualifiers da ka jingiakhaid da 0-0 pyrshah ia ka Bangladesh ha ka Group A kaba la long ha Jawaharlal Nehru Stadium, Shillong ha ka sngi Baar.
Ki nongpeitkai kiba la don 14,900 ngut kila tuid sha madan JN Stadium ban peitkai ia kane ka jingiakhun, ha kaba u Myntri Rangbah ka jylla u Conrad K Sangma ruh ula leit ban peit ia kane ka jingiakhun, ia kaba la iadonlang lang u Secretary General ka All India Football Federation u Anilkumar P bad u President ka Meghalaya Football Association u Bah Hamletson Dohling.
U Coach jong ka ri India u Manolo Márquez ula pynmih bujli haduh 5 ngut ki nongialehkai na ka kynhun kaba la pynrem ia ka Maldives ha ka jingialehkai paralok kaba la long ha ka taiew kaba la dep. Mynta ka kynti ula pynmih noh da u Boris Singh Thangjam, Udanta Singh Kumam, Lalengmawia Ralte, Sandesh Jhingan bad u Farukh Choudhary bad la pynkhamti ruh ha u Sandesh kum u kapten jong ka kynhun ialehkai ka India.
Mar ia sdang ka jingiakhun, tang katto katne sekhon ka Bangladesh kala ioh ia ka kabu ban thep kol haba u nongapkol ka India u Vishal Kaith ula shut ia ka bol bad kala leit poi pynban sha Md Mojibor Jony hynrei haba ula shut ia ka bol kam shym la leit satia shapoh kol bad kane kala pynsting mynsiem ia ki nongialehkai ka India.
Hadien kane ruh, u nongialehkai ka Bangladesh u Md Shakil Topu ula shut ia ka bol ban pynpoi sha u Md Shariar Emon hynrei haba ula pyndei da ka khlieh ia ka bol kala iaid najrong jong ka kol ban leit shabar.
Ha ki 15 minit jong ka jingialehkai, ka Bangladesh kala pynklumar khlieh ia ki nongialehkai ka India khamtam ia u nongapkol uba la kum bakla hynrei u nongialehkai shadien ka India u Subhasish Bose ula ioh ban shut noh ia ka bol sharud shwa ba kan ioh rung shapoh kol.
Hadien kane, ka India kala sdang ban ialehkai bha bad u Liston Colaco ula ioh ban tynjuh ia u nongap kol ka Bangladesh u Mitul Marma hynrei namar ba ka jingshut ka jongu ia ka bol kam shym la long than kaba jam, kumta u nongapkol ka Bangladesh ula ioh ban kem ia ka bol da kaba suk.
Ka India kala thaw ia ki katto katne ki kabu hynrei kam shym la lah satia pat ban thep kol ha ka kylla step.
Ha ka kylla miet, u Colaco ula bteng ban ialehkai bha bad ha ka minit kaba 54 ula shut ia ka bol ban ai ia u Sunil Chhetri hynrei namar ka jingbym ioh bha ia katei ka bol ym shim la lah ban thep ia ka kol.
Nangne ka India kala bteng ban tur shakhmat ban pyrshang ban thaw ia ki lad ban ioh thep kol hynrei kam shym la seisoh satia.
U Hamza Choudhury uba la wan ialehkai na ka bynta ka ri Bangladesh ula pyni iaka sap ialehkai shadien ka jongu ha kaba ym shim la ailad ia ki nongialehkai ka India ba kin ioh rah da kaba suk ia ka bol bad une u nongialehkai na ka Club kaba na England ula iengskhem ban iada ba ka India kan ym ioh thep kol bad kila don ruh ki khyllipmat kiba ula mih ban tur lang shakhmat.
Ha kawei pat ka jingiakhun ha ka Group A hapdeng ka Singapore bad ka Hong Kong ruh kaba la long ha ka sngi Baar kala kut ha ka jingiakhiad da 0-0.
