Tinsukia, Rymphang 18: Haduh 10 ngut ki briew kiba trei bylla ha ki 14 tylli ki par dewiong ha ka thain Finboro, Changlang District ka Arunachal Pradesh, kila shah rahbor ha ki suba kaikhlaw NSCN bad ULFA-I hynne ka step sngi U Blei.
U Superintendent of Police ka Tinsukia Abhijit Gurav ula pyntip ia kane ka jingia bad ong ba ka jingshah rahbor kala jia ha Changlang District.
“Ngim da tip bha katno ngut ki briew ba shah rahbor hynrei la pynthikna ba katto katne ngut ki dei kiba trei ha ki thain Finboro. Ym pat shai bha la kine ki nongtrei ki dei na Assam ne na kano ka jaka. Hadien katto katne por baroh kiei kiei kin sa shai kdar” ong une u Heh Pulit.
Ka tyllong khubor ka iathuh ba ki suba kynhun kaikhlaw ba don kumba 7 ngut eiei, kila rahbor ia kine ki nongbylla hapdeng ka jingpynap suloi bad ialam ia ki sha kawei ka jaka bala tip kumka Old Longtoi, ka jaka ba sha kyndong bha jong ka Arunachal Pradesh.
Uwei napdeng kine kiba shah rahbor u dei uba la tip kyrteng u Gyan Thapa.
Ka khubor ka iathuh ba ki bor pahara kila pynlong mynta ia ka jingkhynra kaba jur bha ban lapdien ia kine ki nongbylla kiba shah rahbor.
“Ka Tirap, Longding bad Changlang District ka Arunachal Pradesh ki dei kiba shah ktah jur bha ha ki kam kaikhlaw namar ka jingdon marjan bad ka khappud Mynmar. Kiba bun ki kaikhlaw kynthup ka ULFA-I kila pynlong jaka rieh ha Myanmar bad don ruh ia ki ktem” ong ka khubor Pulit.
Une u Heh Pulit ula ong ba kane ka jingrahbor kam dei satia kaba dang jia ha ka sien ba nyngkong hynrei la bun ngut ki briew kila shah rahbor ha Changlang.
