Itanagar, Rymphang 23: Saw ngut ki dkhot jong ka longïing na Gujarat ki la ngat ha ka ain hadien ba saphriang ka video ba arngut ki la leh tohmet bad byrngem byrsit ïa ki nongtrei ha kawei ka Resort kaba don ha Dibang Valley jong ka Arunachal Pradesh.
Katkum ka jingujor ba la mudui da ki nongpyniaid ka resort, la pyntip sha ki nongwan kai (guest) ba ynda ki la poi, ym shah ia ki ban bam shabar bad dih kyiad ha katei ka jaka, katkum ka polisi jong katei ka resort.
Hynrei ha ka 20 tarik u Rymphang, la kynnoh ba katei ka longïing ka la wanrah ïa ki jingdih buaid na shabar bad ki la leh pyrshah haba la pynkynmaw ïa ki kyndon.
Ka ejahar (FIR) kaba la ujor ha Anini police station, ki kyrteng ki kynthup ïa ka Aastha Devendra Kumar Patel, Dhruv Devendra Kumar Patel, ka Smita Devendra Kumar Patel bad u Devendra Kumar Patel kiba la leit sha ka Mishmi Hills Resort ha ka 18 tarik u Rymphang.
Katkum ka FIR ka kynnoh ba ka Aastha bad u Dhruv Patel ki la pyndonkam da ki ktien kiba sniew bad kiba pynjah burom ia ki nongtrei kynthei, katba u Dhruv Patel u la pyrshang ruh ban thombor ia kawei ka nongtrei.
La kynnoh ruh ba u nongshah kynnoh u la pynjulor ïa ka dur jong ki kyndon jong ka resort kiba la wah ha ki kynroh bad u la byrngem ban pynjah burom ïa kane ka jaka bad ban khang noh ïa ka da kaba pyndonkam ïa ki “jingïadei kaba donbor”.
Ha kajuh ka por, ki pulit ki la register ïa kane ka case hapoh ki kyndon kiba bun jong ka Bharatiya Nyaya Sanhita, ba kynthup ïa ka jingshah thombor ne ka jingpyndonkam da ka bor pyrshah ïa ka kynthei, ki kam jakhlia bad ka jingpyntieng pynsmiej, ryngkat bad ki kyndon jong ka aiñ SC/ST (Prevention of Atrocities) Act.
Ka Managing Director ka Mishmi Hill Resort ka Chimi Linggi ka la ong, ka la tuklar hadien ba la pyntip ia katei ka jingjia, da kaba bynrap ba u district tourism officer u la don lang bad la pyrshang ban pynbeit ia katei ka kam da ka jingiasuk. “Ngi la pyrshang ban kren da ka lynti ba jai jai, hynrei ki la bteng ban bitar.
Ki nongtrei jong ngi, kiba bun na ki jaka ba shapoh, ki la shah pynkhihwin ha katei ka jingjia,” ka la ong da kaba pynksan ba ka jaka jngohkai pyrthei ka pdiang sngewbha ïa baroh ki nongwan jngohkai pyrthei hynrei kam lah ban pdiang ïa kum kane ka jingleh.
U superintendent of police (SP) ka Dibang Valley u Ringu N u la ong,“Ngi la phah ia ki ophisar ban pynshisha ia kane ka kam hadien ba la paw ka video.U nongshah kynnoh u la mih noh ha ka step jong ka 21 tarik u Rymphang.”
U la ong ba ka jingtohkit ka la iaid shakhmat.
