Itanagar, Iaiong 25 : Ka jingther u lapbah lapsan kala wanrah ia ka jingshah rong noh ka surok National Highway 313 ha Arunachal Pradesh kaba pyniasoh ia ka Dibang Valley District bad kiwei pat ki bynta jong ka Ri India.
Kat kum ka khubor,ka jingjulorjong ka surok kala jubor bha khamtam ha ka thain kaba don hapdeng ka Hunli bad Anini, kaba la pyndkut syndon ia kane ka District na kiwei pat ki bynta jong ka Ri. Ka surok Roing-Anini Highway ka dei ka jingim jong ka Dibang Valley, bad ka dei ka lynti ban pynpoi ia ki mar ki mata bad ki briew sha ka thain.
Da kane ka jingjia, ki bor District kila pynmih ia ki jingbthah ba kyntu ia ki nongshongshnong ba kin phikir bad kiar na kaba leit jingleit katba ym pat dep ban maramot ia ka surok bad pat bha ka suinbneng. Ki bor Sorkar kial maham ruh ba ka jingtwa khyndew, jingshlei um bad jingkiew um ha ki wah ka lah ban jur bha ha kane ka aiom bala jan ka lyiur.
Kane ka jingjia ka pyni ia ka jingima jong ki jingtei ba kongsan ha ka thain bad ki jingeh ba ki paidbah kin iakynduh ha ka leit ka wan.
Ka surok Roing-Anini ka dei kaba kongsan bha ia ki paidbah ka thain bad ka dei ruh kaba donkam palat na ka bynta ki lad jingiada ia ka Ri ha ki khappud ka China.
