Itanagar, Jylliew 02 : Ka Bharatiya Janata Party (BJP) kala tam shakhmat ia baroh kiwei ki seng sain pyrthei bad kala jop haduh 15 seat bad tam ha ki 31 seat katba ka jingniew vote ka dang iaid shakhmat hynne ka sngi U Blei.
Ka jingniew vote ka dang iaid shaid shaid ha ki 24 tylli ki centre jong ki 24 tylli ki District kane ka Jylla ka thain Shatei Lam Mihngi.
Ki kyrtong ka BJP kila tam ha ki 31 seat ba kynthup ia ka Along (East), Along (West), Anini, Basar, Changlang (North), Changlang (South), Dambuk, Kalaktang, Koloriang, Lekang, Likabali (ST), Lumla, Nacho, Namsai, Nari Koyu (ST), Palin, bad Pongchau-Wakka.
Ka National People’s Party (NPP) kala tam ha ki 6 tylli ki seat ba kynthup ia ka Bordumsa, Diyun, Dirang, Liromoba, Rumgong, bad Tawang.
Ka Nationalist Congress Party (NCP) kala tam ha ki 3 tylli ki seat kata ka Bordumsa-Diyun, Lekang, bad d Yachuli katba ka People’s Party of Arunachal (PPA) kala tam ha ki 2 tylli ki seats—Doimukh bad Mebo.
U kyrtong shimet Wanglam Sawin ula jop na Khonsa (East) seat. Ka Congress kaba don ha Liang Pyrhsha kaba la pynieng haduh 19 seat, kam pat ioh eiei satia.
Hadien ba ka BJP kala jop lypa ha ki 10 seat namar ka jingbym don ba iakhun pyrshah, ka elekshon sha ki 50 tylli ki constituency ba sah bad kumjuh ruh ka elekshon Lok Sabha jong ki artylli ki seat-ka Arunachal West bad Arunachal East, kala long ha ka 19 tarik Iaiong.
