Itanagar, Risaw 26 : Ka Sorkar Arunachal Pradesh kala pynbna ia ki skul Secondary ka Sorkar ba don ha ka Jylla kum ki ‘Heritage School’ bad phaikhmat kyrpang bha ban pyntrei ia ki jingtei kiba kongsan nalor ki museum hapoh ka skul.
Ia kane la pynbna da ka Sorkar Jylla ha ka jingrakhe ia ka Platinum Jubilee jong ka skul Secondary ka Sorkar ha Balek, East Siang District.
Kane ka skul kaba la seng kum ka Lower Primary ha u snem 1946, kala rakhe mynta ia ka jingdap 75 snem bad la plie ia kane ka jingrakhe da u Myntri Rangbah ka Jylla Pema Khandu ha ka sngi Balang.
“Kane ka dei kawei na kiba biang eh ki jingkyrpad kaba wan sha nga. Ym tang kane ka skul, hynrei baroh ki skul Sorkar ba seng shuwa ka jingioh laitluid, kin hap noh ha ka thup kum ki Heritage school kiba don bad ki museum ki ban pyni ia ka jingriewspah ha ka khana pateng” ong u Khandu.
U Khandu ula ong ban a ki 3-4 tylli ki skul bala seng shuwa ka jingioh laitluid, ka Arunachal Pradesh kala don mynta haduh 3000 tylli ki skul Sorkar ha kylleng ka Jylla.
“Ngi la iakynduh ia bun ki jingtynjuh khamtam ha ka kam pule dangle hynrei ngi la shimkhia ban kyntiew shakhmat ia ka kam” ula ong.
U Khandu ula ong “Ngi la shimkhia bha ia ka kam pule dangle. Ngi la khangdam haduh 400 tylli ki skul Sorkar ki bym don shuh ki khynnah skul. Kane ka dang iaid haduh mynta. Ngim donkam bun ki skul hynrei ngi donkam ia ka pule ka dangle kaba janai ha ki skul kiba don mynta ia kaba ka Sorkar kala ai ia ki jingkyrshan”.
