Itanagar, Rymphang 17 :Ki bor pulit ki la hap ban pyndonkam da ki jingsiat pynsat khmat bad ther kuli sha suin ban tehlakam ia ki samla pule kiba pynlong jingiakhih ha ki lynti surok ha Itanagar mynta ka sngi 17 tarik.
Hapdeng ka pakhang shnong kaba dang iaid shakhmat, ka jingiakynad ka la khie mynta ka sngi Thohdieng ha ka nongbah Itanagar, kata hadien ba ki samla kiba pynlong jingiakhih ki la pynkhein ia ki kyndon ain Section 144 CrPc.
Kiba bun ki video jong kitei ki jingjia ki la mih paw ha kaba la iohi halor ha ka jingthylli jong ka surok National Highway (NH) 52 kaba iaid lyngba ka Itanagar lait noh ki nongiakhih kiba la tar ia ki banar kiba don ia ki dur jong u Myntri Rangbah ka Arunachal u Prem Khandu.
Ha kine ki video la iohi ba ki nongiakhih pyrshah ki la iaid laitluid ha ki lynti surok ha ryngkat ki dieng ha ki kti bad khang ia baroh kawei ka surok.
Ha kawei pat ka bynta, na ka liang ki bor pulit ha kane ka jaka sor ki la pyrshang ban tehlakam ia ka jinglong jingman bad khanglad ia kine ki nongiakhih pyrshah ba kin pynlong ia ka jingiaid paidbah.
Ki samla wad kam kiba angnud ban iakhun ia ki eksamin ba la pyniaid da ka Arunachal Pradesh Public service Commission (APPSC) ki la khot ia ka pakhang shnong mynta k 17 tarik naduh ka por 5 baje mynstep.
Ha kawei pat ka liang ka sorkar Arunachal mynta ka sngi ka la pynsangeh noh ha kaba iadei bad ka jingialang pyntian smai ia u chairman bathymmai ka APPSC lem bad ki dkhot jong ka kaba dei ka jingdawa kaba kongsan tam jong kitei ki samla, ong ka tyllong khubor.
