Guwahati, Naitung 10: U Myntri Rangbah ka jylla Arunachal Pradesh u Pema Khandu ha ka sngi Balang u la pynpaw ba ka jingtei jong ka China ia ka Mega Dam ha ka wah Yarlung Tsangpo kaba don marjan bad ka khappud jong ka jylla kadei ka mat ba sngewkhia bha na ka bynta ka India.
U Khandu u la ong ba kane ka dam kadei ka buit sianti ban pynlong kum ka “bomb um” bad kane kan buh jingma ba khraw ha ka jinglong jingman bad kane kan kham khraw ban ia ka jingma na ki bor jong ki shipai.
U Myntri Rangbah ka Arunachal u la ong ba ka jylla Arunachal Pradesh ka ia sam ia ka khappud ba 1,200 km border bad ka Tibet, ym bat ka China.
“Kumba ka long, hooid ka Tibet mynta ka don hapoh jong ka China bad ia kane ngin ym lah ban kyntait, hynrei ha kaba nyngkong ngi ia sam ia ka khappud bad ka Tibet,” la ong u Khandu ha kawei na ki lad pathai khubor ha Delhi.
Shuh shuh u Khandu u la ong ba ka India kan nym don kano kano ka jingkhuslai lada ka China ka la soi ia ka soskular um jong ka pyrthei (international water treaty). “ Shubuh lada shna ia ka dam bad ki pyllait kynsan ia ka um, ka thain Siang kan sa shah pynjot lut baroh”, u la ong.
Halor ka jingma kaba lah ban mih, u Khandu u la ong ba ka sorkar Arunachal, ka la iasyllok bad ka bad ka sorkar kmie, ka la tyrwa ban tei ia ka Siang upper Multipurpose project, kum ka lad jingiada bad ban pynthikna ia ka jingshngain ha ka um.
Halor kane, ki paidbah nong shong shnong kila pyrshah jur ia katei ka project bad kila pynlong ruh ka jingiakhih ban pyrshah ha kine ki por ba la dep.
U myntri rangbah u la ong ba um thikna la ka jingtei ia ka dam jong ka China ka la sdang ne em, da kaba kdew ba ka ri kam iasam ia kano kano ka jingtip, Hynrei u la pynpaw beit ia ka jingsngewkhia ba kane ka projek ka lah ban pynduna ia ka jingtuid ka um ha ka wah Siang bad wah Brahmaputra.
